ବରଗଡ: ଓଡ଼ିଶାର ଭାତହାଣ୍ଡି କୁହାଯାଉଥିବା ବରଗଡ ଜିଲ୍ଲାରେ ଚଳିତ ରବି ଫସଲ ପାଇଁ ଧାନ ସଂଗ୍ରହ କମିଟିର ଜିଲ୍ଲାସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି । ଗୁରୁବାର ଜିଲ୍ଲାପାଳ ମନୀଷା ବାନାର୍ଜୀଙ୍କର ଅଧ୍ୟକ୍ଷତାରେ ଜିଲ୍ଲା ସ୍ତରୀୟ ଧାନ ସଂଗ୍ରହ କମିଟିର ବୈଠକ ସ୍ଥାନୀୟ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାଠାରେ ବସିଛି । ଏଥିରେ ହସ୍ତତନ୍ତ, ବୟନଶିଳ୍ପ ଓ ହସ୍ତଶିଳ୍ପ ମନ୍ତ୍ରୀ ରୀତା ସାହୁ, ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ତଥା ବରଗଡ ବିଧାୟକ ଦେବେଶ ଆଚାର୍ଯ୍ୟ, ଲୋକସଭା ସାଂସଦଙ୍କ ପ୍ରତିନିଧି ସୁରେଶ ଶତପଥୀ ଏବଂ ଜିଲ୍ଲା ଆରକ୍ଷୀ ଅଧିକ୍ଷକ ପ୍ରହଲ୍ଲାଦ ସହାଇ ମୀନାଙ୍କ ସମେତ ସମସ୍ତ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ । ଜିଲ୍ଲାର ବିଭିନ୍ନ ଚାଷୀ ସଂଗଠନର ପ୍ରତିନିଧିମାନଙ୍କୁ ନେଇ ବୈଠକରେ ଆଲୋଚନା କରାଯାଇଥିଲା ।
ଚଳିତ ରବି ଋତୁରେ ଧାନ ସଂଗ୍ରହ ଯେପରି ସୁବିଧାରେ ହେବ ସେଥିପାଇଁ ସମ୍ପୃକ୍ତ ଅଧିକାରୀ ଓ କର୍ମଚାରୀମାନଙ୍କୁ ଜିଲ୍ଲାପାଳ ମନୀଷା ବାନାର୍ଜୀ ପରାମର୍ଶ ଦେଇଥିଲେ । ବିଗତ ଖରିଫ ଋତୁରେ କୌଣସି ଚାଷୀମାନଙ୍କର ଟୋକନ ଅକାମୀ ହୋଇନଥିବାରୁ ଏଥିପାଇଁ ସାଂସଦଙ୍କ ପ୍ରତିନିଧି ସୁରେଶ ଶତପଥୀ ଜିଲ୍ଲାପାଳଙ୍କୁ ଧନ୍ୟବାଦ ଜଣାଇଥିଲେ । ଜିଲ୍ଲା ଯୋଗାଣ ଅଧିକାରୀ ଦାଶରଥି ସୋରେନ କାର୍ଯ୍ୟସୂଚୀ ଅନୁଯାୟୀ ଆଲୋଚନା କରିଥିଲେ । ରବି ଋତୁର ଧାନ ସଂଗ୍ରହ ଲାଗି ଅତାବିରା ନିୟନ୍ତ୍ରିତ ବଜାର କମିଟିର ଧାନ ମଣ୍ଡି ଖୋଲିବା ପାଇଁ ମେ' ମାସ ୬ ତାରିଖ ଧାର୍ଯ୍ୟ ହୋଇଥିବା ବେଳେ ବରଗଡ, ଭେଡେନ, ବରପାଲି, ଭଟଲି, ଆମ୍ବାଭୋନା ପାଇଁ ମେ' ୧୨ ତାରିଖ ସ୍ଥିର କରାଯାଇଛି ।
