ବରଗଡ: ବରଗଡ ଜିଲ୍ଲା ବରପାଲି ଥାନା ଅନ୍ତର୍ଗତ ମହଦା ନିକଟରେ ଥିବା ରାଞ୍ଜ ନଦୀରେ ଜଣେ ଯୁବତୀଙ୍କ ମୃତଦେହକୁ ଉଦ୍ଧାର କରାଯାଇଛି । ଉଦ୍ଧାର ମୃତଦେହର ଆଜି ବରଗଡ ଟାଉନସ୍ଥିତ ପୁରୁଣା ଡାକ୍ତରଖାନାରେ ଶବ ବ୍ୟବଚ୍ଛେଦ କରାଯାଇଛି । ଯୁବତୀ ଜଣଙ୍କର ଶରୀରରେ ବିଭିନ୍ନ ସ୍ଥାନରେ କ୍ଷତବିକ୍ଷତ ଚିହ୍ନ ରହିଥିବାବେଳେ ବେକକୁ କଟାଯାଇ ଯୁବତୀଙ୍କୁ ହତ୍ୟା କରାଯାଇଥିବା ସ୍ପଷ୍ଟ ବାରିହେଉଛି । ତେବେ ପ୍ରେମ ବ୍ୟାପାରକୁ ନେଇ ପ୍ରେମିକାକୁ ହତ୍ୟା କରାଯାଇଥିବା ପୋଲିସ ସନ୍ଦେହ କରିଛି ।
ସୂଚନା ଅନୁଯାୟୀ ମୃତ ଯୁବତୀ ଜଣକ ବରପାଲି ଥାନା ତେଜଙ୍ଗ ଗାଁର ହୋଇଥିବାବେଳେ ସେ ଘରେ ପରୀକ୍ଷା ଦେବାକୁ ଯାଉଥିବା କହି ଘରୁ ଆସିଥିଲେ। ମାତ୍ର ମହଦା ନିକଟରେ ଥିବା ରାଞ୍ଜ ନଦୀରେ ଯୁବତୀଙ୍କ ମୃତଦେହ ମିଳିଥିଲା । ଏହା ଏକ ସୁଚିନ୍ତିତ ପ୍ରେମ ଜନିତ ହତ୍ୟାକାଣ୍ଡ ଏବଂ ହତ୍ୟା କରିବା ପରେ ପ୍ରେମିକ ଓ ଅନ୍ୟ କେତେକ ଯୁବକ ଫେରାର ହୋଇଯାଇଥିବା ଅନୁମାନ କରାଯାଉଥିବା ବରପାଲି ଆଇଆଇସି ସୂଚନା ଦେଇଛନ୍ତି।
ପୋଲିସ ବରପାଲି ଥାନାରେ କେଶ ନମ୍ବର 146/2022 ଦଫା 302ରେ ଏକ ହତ୍ୟା ମାମଲା ରୁଜୁ କରି ଘଟଣାର ତଦନ୍ତ କରୁଛି। ମୃତ ଯୁବତୀ ଜଣକ ଅତାବିରା ଥାନା ଅଞ୍ଚଳର ଜଣେ ଶିକ୍ଷକଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା । ଉଭୟ ଅନ୍ୟ ଜାତିର ହୋଇଥିବାରୁ ବିବାହକୁ ନେଇ ଗଣ୍ଡଗୋଳ ସୃଷ୍ଟି ହୋଇ ପରେ ପ୍ରେମିକାକୁ ହତ୍ୟା କରିଥିବା ପୋଲିସ ଅନୁମାନ କରୁଛି । ଆସନ୍ତା 12 ତାରିଖରେ ପ୍ରେମିକ ଶିକ୍ଷକଙ୍କ ଅନ୍ୟତ୍ର ବିବାହ ସ୍ଥିର ହୋଇଥିବା ବରପାଲି ଥାନା ଆଇଆଇସି ରୋଜାଲିନ ପଟେଲ କହିଛନ୍ତି । ତେବେ ଶବ ବ୍ୟବଛେଦ ରିପୋର୍ଟ ମିଳିବା ପରେ ଯୁବତୀଙ୍କୁ କେମିତି ହତ୍ୟା କରାଯାଇଛି ତାହା ଜଣାପଡିବ ଓ ଖୁବ ଶୀଘ୍ର ଘଟଣାର ପର୍ଦ୍ଦାଫାଶ ହେବ ଓ ଅଭିଯୁକ୍ତ ମାନେ ଗିରଫ ହେବେ ବୋଲି ପୋଲିସ ସୂଚନା ଦେଇଛି ।
ବରଗଡରୁ ରାଜେସ ସରାଫ, ଇଟିଭି ଭାରତ
