ବରଗଡ଼: ପଡୋଶୀ ଛତିଶଗଡ଼ର ଜଣେ ଯୁବକ ଓଡିଶାରେ ଅପହୃତ। କେବଳେ ସେତିକି ନୁହେଁ ତାଙ୍କୁ ଛାଡିବା ପାଇଁ ମଧ୍ୟ 25 ଲକ୍ଷ ଟଙ୍କା ଦାବି କରାଯାଇଛି । ଏଭଳି ଘଟଣା ଦେଖିବାକୁ ମିଳିଛି ବରଗଡରେ। ଅପହୃତ ହୋଇଥିବା ଯୁବକ ପଡୋଶୀ ରାଜ୍ୟର ଚମ୍ପା ଅଞ୍ଚଳର। ଏନେଇ ସ୍ଥାନୀୟ ଟାଉନ ଥାନାରେ ଅଭିଯୋଗ ହୋଇଛି ।
0 ବିଶ୍ବପ୍ରସାଦ ଚନ୍ଦ୍ରା ନାମକ ଜଣେ ବ୍ୟକ୍ତି ଗତ ବୁଧବାର ତାଙ୍କ ଡ୍ରାଇଭର ସାଙ୍ଗେ ବରଗଡ଼କୁ ଆସି ଏକ ହୋଟେଲରେ ରହିଥିଲେ। ଗତକାଲି ରାତିରେ ସେ ଭଟଲି ରୋଡ଼ର କୌଣସି ଏକ ସ୍ଥାନରେ ତାଙ୍କ ଗାଡ଼ିରୁ ଓହ୍ଲାଇଥିଲେ ଏବଂ ଡ୍ରାଇଭରଙ୍କୁ ହୋଟେଲକୁ ଚାଲିଯିବା ପାଇଁ କହିଥିଲୋ। ରାତ୍ରିଭୋଜନ ସାରି ହୋଟେଲକୁ ସେ ଫେରିବେ ବୋଲି ତାଙ୍କ ଡ୍ରାଇଭରଙ୍କୁ ଜଣାଇଥିଲେ।
ହୋଟେଲରେ ଡ୍ରାଇଭର ପହଞ୍ଚିବା ପରେ ବିଶ୍ୱପ୍ରସାଦଙ୍କର ଆଉ ଫୋନ ଆସିନଥିଲା ଓ ମୋବାଇଲ ସ୍ୱିଚ୍ ଅପ୍ ହୋଇ ଯାଇଥିଲା। ହେଲେ ନିଜର ଘରକୁ ଫୋନ କରି ଅପହୃତ ହୋଇଥିବା ନେଇ ଘରକୁ ଜଣାଇଥିଲେ ବିଶ୍ୱପ୍ରସାଦ। ଅପହରଣକାରୀ ୨୫ ଲକ୍ଷ ଟଙ୍କା ଦାବି କରୁଥିବା ମଧ୍ୟ କହିଥିଲେ।
ଖବର ପାଇବା ପରେ ପରିବାର ଲୋକେ ବରଗଡ଼କୁ ଆସି ଟାଉନ ଥାନାରେ ଲିଖିତ ଅଭିଯୋଗ କରିଥିଲେ । ଏହାପରେ ତଦନ୍ତ ଆରମ୍ଭ କରିଥିଲା ପୋଲିସ। ବରଗଡ଼ ପୋଲିସ ଘଟଣା ସମ୍ପର୍କରେ ଖୋଳତାଡ ଆରମ୍ଭ କରିଥିଲା। ଅପହରଣକାରୀଙ୍କୁ ଦାବି ହୋଇଥିବା 25 ଲକ୍ଷ ଟଙ୍କା ନେଇ ଘଟଣାସ୍ଥଳରେ ପହଞ୍ଚିଥିଲା ପୋଲିସ। ଚତୁରତାର ସହିତ ପୋଲିସ ସେଠାରେ ଦୁଇ ଜଣ ସମ୍ପୃକ୍ତ ଆସମୀଙ୍କୁ କାବୁ କରିବାରେ ସଫଳ ହୋଇଥିଲା । ଏହାସହ ଗୋଟିଏ ଛତିଶଗଡ଼ ଅଞ୍ଚଳର ଏକ କାରକୁ ମଧ୍ୟ ଜବତ କରିଛି ପୋଲିସ।
ବିଶ୍ୱପ୍ରସାଦଙ୍କୁ ପୋଲିସ ଉଦ୍ଧାର କରିପାରିନାହିଁ। ତାଙ୍କୁ ଉଦ୍ଧାର କରିବା ପାଇଁ ବରଗଡ଼ ପୋଲିସର ଏକ ଟିମ ଛତିଶଗଡ଼ ରାଜ୍ୟକୁ ଯାଇଥିବା ବେଳେ ପୋଲିସ ପକ୍ଷରୁ ସମସ୍ତ ଅପହରଣକାରୀଙ୍କୁ ଧରିବା ଲାଗି ଉଦ୍ୟମ ଜାରି ରହିଛି।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
