ବରଗଡ: କୋରୋନା ମହାମାରୀକୁ ନେଇ ଦୀର୍ଘ ଦିନ ହେଲା ଲାଗିରହିଛି ଲକଡାଉନ | ରାସ୍ତାଘାଟରେ ଗଡୁନାହିଁ ଯାନବାହାନ ଏବଂ ସଂପୂର୍ଣ୍ଣ ଠପ ହୋଇପଡିଛି ଜନଜୀବନ | ରୋଗୀ ମାନଙ୍କୁ ଡାକ୍ତରଖାନା ନେବାକୁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ | ବିନା ପାସରେ ରାସ୍ତାରେ ଗଡିପାରୁ ନାହିଁ ଯାନବାହାନ |ସମସ୍ତ ରୋଗୀଙ୍କୁ ଏବେ କେବଳ ଆମ୍ବୁଲାନ୍ସ ଉପରେ ହିଁ ନିର୍ଭର କରିବାକୁ ପଡୁଛି ଡାକ୍ତରଖାନାକୁ ଯିବାପାଇଁ |
ଲକଡାଉନ ସମୟରେ ବରଗଡ ରେଲୱେ ଷ୍ଟେସନପଡାର ଅଟୋ ଚାଳକ ରଞ୍ଜିତ ଯାଦବ ରୋଗୀଙ୍କ ପାଇଁ ଦେବଦୂତ ପାଲଟିଛନ୍ତି | ରଞ୍ଜିତ ଅଟୋରେ ସବାରୀ ନେବା ଆଣିବା କରି ତାଙ୍କର ପରିବାର ପ୍ରତିପୋଷଣ କରିଥାନ୍ତି | ବର୍ତ୍ତମାନ ଲକଡାଉନ ସମୟରେ ତାଙ୍କ ଅଟୋକୁ ସମାଜସେବାରେ ଲଗାଇଛନ୍ତି ଏବଂ ମାଗଣାରେ ରୋଗୀଙ୍କୁ ଡାକ୍ତରଖାନାକୁ ନେବା ଆଣିବା କରୁଛନ୍ତି | କୌଣସି ଲୋକ ରୋଗରେ ଛଟପଟ ହେଉଥିଲେ ମଧ୍ୟ ବର୍ତ୍ତମାନ ଡାକ୍ତରଖାନାକୁ ନେବାପାଇଁ କେହି ଆସୁନାହାନ୍ତି। ଏଭଳି ସମୟରେ ରୋଗୀଙ୍କ ନିକଟକୁ କେହି ଫୋନ କଲେ ରଞ୍ଜିତ ସଙ୍ଗେ ସଙ୍ଗେ ପହଞ୍ଚିଯାଉଛନ୍ତି ରୋଗୀଙ୍କୁ ବିନା ପଇସାରେ ସାହାଯ୍ୟ କରୁଛନ୍ତି |
ସେହିପରି ରଞ୍ଜିତ ସୋସିଆଲ ମିଡିଆରେ ତାଙ୍କ ମୋବାଇଲ ନମ୍ବର 9777615170 ଦେଇଛନ୍ତି। ଏହା ମାଧ୍ୟମରେ ଅସୁବିଧା ସମୟରେ ଫୋନ କରିବା ପାଇଁ କହିଛନ୍ତି | ବରଗଡ ବୁଦ୍ଧିଜୀବୀ ମହଲରେ ରଞ୍ଜିତ ଯାଦବଙ୍କର ଏପରି ମହାନ ସେବାକୁ ଖୁବ ପ୍ରଶଂସା କରାଯାଇଛି |
ବରଗଡରୁ ରାଜେସ ସରାପ, ଇଟିଭି ଭାରତ
