ବରଗଡ: ଭୋକିଲାଙ୍କୁ ଆହାର ଯୋଗାଉଥିବା ସମାଜସେବୀଙ୍କୁ ପୋଲିସବାବୁଙ୍କ ଦୁର୍ବ୍ୟବହାର । ଲକଡାଉନ ସମୟରେ ଅସହାୟମାନଙ୍କୁ ସହାୟତା କରୁଥିବା ବେଳେ ବରଗଡର ଜଣେ ପୋଲିସ କର୍ମଚାରୀ ସମାଜସେବୀ ଜଣଙ୍କୁ ଗାଳିଗୁଲଜ କରିଥିବା ନେଇ ଏସପି ଓ ଜିଲ୍ଲାପାଳଙ୍କ ନିକଟରେ ଅଭିଯୋଗ ହୋଇଛି ।
ଦୀର୍ଘ 37 ଦିନ ହେବ କିଛି ସମାଜସେବୀ ପ୍ରତିଦିନ ସହରର ବିଭିନ୍ନ ସ୍ଥାନରେ ଥିବା 700 ଗରିବଙ୍କୁ ଖାଇବା ଯୋଗାଇ ଆସୁଛନ୍ତି । ହେଲେ ଗତକାଲି ଜଣେ ପୋଲିସ କର୍ମଚାରୀ ଏହି ସମାଜସେବୀଙ୍କୁ ଅଟୋକୁ ଅଟକାଇବା ସହ ଘରକୁ ପଠାଇଥିଲେ । ଆଉ କହିଥିଲେ ଯିଏ, ଅସୁବିଧାରେ ଅଛନ୍ତି ସେମାନେ ତାଙ୍କର ସୁବିଧା କରିବେ । ଫଳରେ ଭଟିଲ ଛକ ନିକଟରେ ବହୁ ଗରିବ ଓ ଅସହାୟ ବ୍ୟକ୍ତି ଭୋକ ଉପସାରେ ଦିନ କାଟିଛନ୍ତି ।
କେଉଁଠି ଲୋକେ ଖାଇବାକୁ ପାଉନଥିବା ଖବର ପାଇଲେ ପୋଲିସ ବିଭାଗ ପକ୍ଷରୁ ଏହି ସମାଜସେବୀଙ୍କୁ ଖାଦ୍ୟ ଯୋଗେଇଦେବାକୁ କୁହାଯାଉଛି | ଏଠି ସ୍ବେଚ୍ଛାସେବୀଙ୍କୁ ପୋଲିସର ଏପରି ଦୁର୍ବ୍ୟବହାର କେତେ ଦୂର ଯୁକ୍ତିଯୁକ୍ତ । ସେପଟେ ଏପରି ସମୟରେ ପୋଲିସ ବାବୁଙ୍କ ମାନସିକତାକୁ ବରଗଡ ବୁଦ୍ଧିଜୀବୀ ମହଲରେ ନିନ୍ଦା କରାଯାଇଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
