ବରଗଡ଼: ଲକଡାଉନ ସମୟରେ ବହୁ ଶ୍ରମିକ ବାହାର ରାଜ୍ୟ ମାନଙ୍କରେ ଫସି ରହିଥିବା ବେଳେ ଏବେ ସମସ୍ତ ଶ୍ରମିକ ନିଜ ନିଜ ରାଜ୍ୟକୁ ଫେରିବାରେ ଲାଗିଛନ୍ତି । ଏବେ ମଧ୍ୟ ଗୋଟେ ରାଜ୍ୟରୁ ଅନ୍ୟ ଗୋଟେ ରାଜ୍ୟକୁ ଯାତ୍ରୀବାହୀ ଯାନବାହନ ଚଳାଚଳ ସମ୍ପୂର୍ଣ୍ଣ ବନ୍ଦ ହୋଇଥିବା କାରଣରୁ କିଏ ଚାଲିଚାଲି ତ ଆଉକିଏ ସାଇକେଲ ଜରିଆରେ ସପରିବାର ନିଜନିଜ ରାଜ୍ୟକୁ ଫେରୁଥିବା ଦେଖିବାକୁ ମିଳୁଛି । ତେବେ ବରଗଡ଼ ଜିଲ୍ଲା ଦେଇ ଯାଇଥିବା ରାଜପଥରେ ପ୍ରତିଦିନ ଶହ ଶହ ମାଲବୋଝେଇ ଟ୍ରକ ଯୋଗେ ବହୁ ଶ୍ରମିକ ଯାତ୍ରା କରୁଛନ୍ତି ।
ମାଲବାହୀ ଗାଡ଼ି କଣ୍ଟେନରରେ ଶ୍ରମିକ ବୁହା ହେବା ଘଟଣା ମଧ୍ୟ ସାମ୍ନାକୁ ଆସିଛି । ରେଡ଼ ଜୋନ ମହାରାଷ୍ଟ୍ର ରାଜ୍ୟରୁ କଲିକତାକୁ ଯାଉଥିବା ଏକ ମାଲବାହୀ କଣ୍ଟେନରରେ ୪୧ ଜଣ ଶ୍ରମିକ ସୋମବାର ନିଜ ଘରକୁ ଯାଉଥିବା ଦେଖିବାକୁ ମିଳିଥିଲା । ଏପରି ସ୍ଥଳେ ଏମାନେ ପିଇବାକୁ ପାଣି ଟୋପାଏ ମଧ୍ୟ ପାଉ ନ ଥିବା ବେଳେ ବରଗଡ଼ ଜିଲ୍ଲା ରେଙ୍ଗାଲି ଡ୍ୟାମ ଠାରେ ଥିବା ଏକ ପେଟ୍ରୋଲ ପମ୍ପରୁ ପିଇବା ପାଇଁ ପାଣି ବୋହି ନେଉଥିବା ସମୟରେ ଘଟଣାଟି ଲୋକଙ୍କ ନଜରରେ ଆସିଥିଲା ।
କଣ୍ଟେନର ଭିତରେ ଭର୍ତ୍ତିହୋଇ ରହିଥିବା ସମସ୍ତ 41 ଜଣ ଶ୍ରମିକ ବାହାରକୁ ଆସିଥିଲେ କିଛି ସମୟ ବାହାରେ ବୁଲିବା ସହ ଆଗକୁ ଯାତ୍ରା ପାଇଁ ପିଇବା ପାଣି ସଂଗ୍ରହ କରିଥିଲେ ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
