ବାଲେଶ୍ବର: ଯୁବକଙ୍କ ମୃତଦେହ ଉଦ୍ଧାର । ବାଲେଶ୍ଵର ସଦର ଥାନା ଅଧିନ ସଇପୁର ସ୍କୁଲ ପାଖରୁ ଜଣେ ଯୁବକଙ୍କ ମୃତଦେହ ଉଦ୍ଧାର କରିଛି ପୋଲିସ । ମୃତକଙ୍କ ପରିବାର ଲୋକ ହତ୍ୟା ଅଭିଯୋଗ କରିଛନ୍ତି ।
ଯୁବକଙ୍କ ମୃତଦେହ ଉଦ୍ଧାର, ହତ୍ୟା ସନ୍ଦେହ
ସୂଚନା ଅନୁସାରେ, ବାଲେଶ୍ଵରର ସେକପାଟଣା ଅଞ୍ଚଳର ପରମାନନ୍ଦ ବାରିକଙ୍କ ପୁଅ ଚକ୍ରଧର ଗତରାତିରେ ଘରୁ ବାହାରି ବହୁ ସମୟ ଯାଏ ଘରକୁ ଫେରି ନଥିଲେ । ଚକ୍ରଧର ଘରକୁ ନଫେରିବାରୁ ପରିବାର ଲୋକେ ବହୁ ଖୋଜାଖୋଜି କରିଥିଲେ । ବିଳମ୍ବିତ ରାତିରେ ଚକ୍ରଧରଙ୍କ ମୃତଦେହ ସ୍କୁଲ ନିକଟରେ ପଡିଥିବା ଦେଖିବାକୁ ମିଳିଥିଲା । ସଦର ଥାନା ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଜବତ କରିଛି ।
ଅନ୍ୟପଟେ ଚକ୍ରଧରଙ୍କ ଶରୀର ଓ ମୁଣ୍ଡରେ କ୍ଷତ ଚିହ୍ନ ଥିବାରୁ ଏହା ଏକ ହତ୍ୟାକାଣ୍ଡ ବୋଲି ପରିବାର ଲୋକେ ଅଭିଯୋଗ କରିଛନ୍ତି । ତେବେ ଉକ୍ତ ଅଞ୍ଚଳରେ ଚୋରାରେ ଦେଶୀମଦ ଭାଟି ଚାଲିଥିବା ବେଳେ ସେଠାକୁ ଚକ୍ରଧର ମଦ ପିଇବା ପାଇଁ ଯାଇଥିବା କୁହାଯାଉଛି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
