ବାଲେଶ୍ବର: ସ୍ବାମୀ ଆଗରେ ବିଷ ପିଇ ସ୍ତ୍ରୀର ଆତ୍ମହତ୍ୟା । ଏଭଳି ଅଭାବନୀୟ ଘଟଣା ଘଟିଛି ବାଲେଶ୍ବରର ଜଳେଶ୍ବର ଅଞ୍ଚଳରେ । ହେଲେ ଏହା ଆତ୍ମହତ୍ୟା ନୁହେଁ ହତ୍ୟା ବୋଲି ଅଭିଯୋଗ ଆଣିଛନ୍ତି ମୃତ ମହିଳାଙ୍କ ପରିବାର ଲୋକେ ।
ବାଲେଶ୍ବର ସିଙ୍ଗଲା ଥାନା ଅଧିନସ୍ଥ ପାଉଁଶକୁଲି ଗ୍ରାମ ପଞ୍ଚାୟତର ବେଗୁନିଆ ଗ୍ରାମର ଶୁଭେନ୍ଦୁ ସାହୁ 2014 ମସିହାରେ ସାନପଢ଼ିହାରୀପୁର ଗ୍ରାମର ରିତା ସାହୁ (28)ଙ୍କୁ ବିବାହ କରିଥିଲେ । ଶୁଭେନ୍ଦୁ ସାହୁ ଜଳେଶ୍ବର ଆୟକର ବିଭାଗରେ କାମ କରନ୍ତି । ଜଳେଶ୍ବର ଥାନା ରାଜପୁର ଅଞ୍ଚଳରେ ଉଭୟ ସ୍ବାମୀ-ସ୍ତ୍ରୀ ଏକ ଭଡା ଘରେ ରହି ଆସୁଥିଲେ । ଦୁହିଁଙ୍କ ମଧ୍ୟରେ କୌଣସି କାରଣରୁ ଝଗଡା ହୋଇଥିଲା । ଏଥିରେ ରିତା ସାହୁ ସ୍ବାମୀଙ୍କ ଆଗରେ ବିଷ ପିଇ ଦେଇଥିଲେ । ଶୁଭେନ୍ଦୁ ତାଙ୍କୁ ଜଳେଶ୍ବର ହସ୍ପିଟାଲକୁ ନେଇ ଆସିଥିଲେ ୲ ହେଲେ ଚିକିତ୍ସିତ ଅବସ୍ଥାରେ ରିତାଙ୍କର ମୃତ୍ୟୁ ହୋଇଥିଲା ।
ଖବର ପାଇ ରିତା ସାହୁଙ୍କ ବାପଘର ଲୋକେ ମେଡିକାଲରେ ପହଞ୍ଚିଥିଲେ । ଶୁଭେନ୍ଦୁ ରିତାଙ୍କୁ ହତ୍ୟା କରିଛି ବୋଲି ସନ୍ଦେହ କରି ଜଳେଶ୍ବର ଥାନାରେ ଅଭିଯୋଗ କରିଛନ୍ତି ପରିବାର ଲୋକେ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
