ବାଲେଶ୍ୱର: ଜିଲ୍ଲା ବାହାନଗା ପଞ୍ଚାୟତରେ ପ୍ରସ୍ତାବିତ ମଦ ଦୋକାନକୁ ନେଇ ପଞ୍ଚାୟତବାସୀ ତୀବ୍ର ବିରୋଧ କରିଛନ୍ତି । ଏନେଇ ଜିଲ୍ଲା ପ୍ରଶାସନ ପାଖରେ ଅଭିଯୋଗ କରିବା ପରେ ପଞ୍ଚାୟତବାସୀ ଜିଲ୍ଲାପାଳ ଅଫିସ ଆଗରେ ବିକ୍ଷୋଭ ପ୍ରଦର୍ଶନ କରିଛନ୍ତି।
ଏହା ମଧ୍ୟ ପଢନ୍ତୁ: ଗଞ୍ଜାପାରାରେ ମଦ ଦୋକାନ ନିଷ୍ପତ୍ତିକୁ ବିରୋଧ, ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ
ଏନେଇ ଜଣେ ଅଞ୍ଚଳବାସୀ କହିଛନ୍ତି ଯେ," ବାହାନଗା ପଞ୍ଚାୟତରେ ପ୍ରସ୍ତାବିତ ମଦ ଦୋକାନକୁ ଆମେ ତୀବ୍ର ବିରୋଧ କରି ଆଜି ଏକାଠି ହୋଇଛୁ । ଏନେଇ ଜିଲ୍ଲାପାଳଙ୍କୁ ଆମେ ଏକ ଦରଖାସ୍ତ ଦେଇଥିଲୁ । କିନ୍ତୁ କୌଣସି ସମାଧାନ ହୋଇପାରିନଥିଲା । ଆଜି ଆମେ ପୁର୍ନବାର ଜିଲ୍ଲାପାଳଙ୍କୁ ଗୁହାରି କରିବା ପାଇଁ ଆସିଛୁ । ଆମ ପଞ୍ଚାୟତରେ ଆମେ କୌଣସି ମଦ ଦୋକାନ ଖୋଲିବୁ ନାହିଁ ବୋଲି ନିଷ୍ପତ୍ତି ନେଇଛୁ । ଯଦି ମଦ ଦୋକାନ ଖୋଲାଯାଏ ତାହାହେଲେ ଆମେ ଆନ୍ଦୋଳନକୁ ତୀବ୍ର କରିବୁ ।"
ସୂଚନାଯୋଗ୍ୟ ଯେ, ଗତ ସେପ୍ଟେମ୍ବର ମାସରେ ନବରଙ୍ଗପୁରର ଏଭଳି ଏକ ଖବର ସାମ୍ନାକୁ ଆସିଥିଲା । ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ ଗଞ୍ଜାପାରା ମୌଜାରେ ଏକ ଠିପି ଖୋଲା ମଦ ଦୋକାନ ଖୋଲିବା ପାଇଁ ସରକାରଙ୍କ ତରଫରୁ ଏକ ପ୍ରସ୍ତାବ ଆସିଥିଲା l ତେବେ ସରକାରଙ୍କ ଏହି ନିଷ୍ପତ୍ତିକୁ ସ୍ଥାନୀୟ ଅଞ୍ଚଳବାସୀ ବିରୋଧ କରିଥିଲେ । ଏନେଇ ଗଞ୍ଜାପାରା ଅଞ୍ଚଳର ଶତାଧିକ ପୁରୁଷ ଓ ମହିଳା ଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଥିଲେ । ରାଇଘର ଠାରୁ ଗଞ୍ଜାପାରା ଯିବା ରାସ୍ତାରେ ଏହି ଦୋକାନ ଖୋଲିବା ପାଇଁ ସମସ୍ତ ପ୍ରସ୍ତୁତି ଚଳାଇଥିବା ବେଳେ ପ୍ରଶାସନକୁ ବିରୋଧ କରିଥିଲେ ସ୍ଥାନୀୟ ବାସିନ୍ଦା l ଉକ୍ତ ଅଞ୍ଚଳରେ ସ୍କୁଲ କଲେଜ ସହ ଏକ ଆଇଟିଆଇ ଭଳି ଶିକ୍ଷାନୁଷ୍ଠାନ ରହିଥିବାରୁ ମଦ ଦୋକାନ ହେଲେ ଛାତ୍ର ଛାତ୍ରୀଙ୍କ ଉପରେ ଖରାପ ପ୍ରଭାବ ପଡିବା ସହ ଯୁବଗୋଷ୍ଠୀଙ୍କ ଭବିଷ୍ୟତ ନଷ୍ଟ ହୋଇଯିବା ସହ ସ୍ଥାନୀୟ ଅଞ୍ଚଳରେ ଅପ୍ରୀତିକର ପରିସ୍ଥିତି ସୃଷ୍ଟି ହେବ ବୋଲି ଅଭିଯୋଗ କରିଥିଲେ ସ୍ଥାନୀୟ ବାସିନ୍ଦା ।
ଇଟିଭି ଭାରତ, ବାଲେଶ୍ବର
