ବାଲେଶ୍ୱର : ନୀଳଗିରିରେ କଂଗ୍ରେସ ପ୍ରାର୍ଥୀ ଭାବେ ରାଣୀମନୋଜା ମଞ୍ଜରୀ ଦେବୀଙ୍କୁ ଦଳୀୟ ଟିକେଟ ମିଳିବା ପରେ ୨୧ତାରିଖ ଜୋରଦାର ବିରୋଧ କରାଯାଇଥିଲା । ସେହିଦିନ ଏମିତି ପରିସ୍ଥିତି ହୋଇଥିଲା ଯେ ୨ଗୋଷ୍ଠୀଙ୍କ ମଧ୍ୟରେ ମାରପିଟ ପର୍ଯ୍ୟନ୍ତ କଥାଯାଇଥିଲା। ଆଉ ଏଥିରେ ୨ଜଣ ଆହତ ମଧ୍ୟ ହୋଇଥିବା ଖବର ମିଳିଥିଲା । ଆଜି ପୁଣି ଏହି ବିବାଦ ଘନାଉଥିବା ଦେଖିବାକୁ ମିଳିଛି । ନୀଳଗିରି କଂଗ୍ରେସ କାର୍ଯ୍ୟାଳୟ ସାମନାରେ ଆଜି ରାଣୀ ମନୋଜାଙ୍କ କୁଶପୁତ୍ତଳିକା ଦାହ କରାଯାଇଥିବା ଦେଖିବାକୁ ମିଳିଛି ।
ସୂଚନା ଅନୁସାରେ, କଂଗ୍ରେସର ୨ ପୁରୁଖା ନେତା ଅକ୍ଷୟ ଆଚାର୍ଯ୍ୟ ଓ ଚିତ୍ତରଂଜନ ଷଡ଼ଙ୍ଗୀ ଦଳକୁ ବଞ୍ଚାଇ ରଖିଥିବା କଥା କହୁଥିବାବେଳେ ରାଣୀମନୋଜାଙ୍କୁ କେମିତି ଟିକେଟ ମିଳିଲା ବୋଲି ଅସନ୍ତୋଷ ପ୍ରକାଶ ପାଇଥିଲା। ଆଜି ନୀଳଗିରି କଂଗ୍ରେସ କାର୍ଯ୍ୟାଳୟ ସାମନାରେ ଛାତ୍ର କଂଗ୍ରେସ ଯୁବ କଂଗ୍ରେସ ଓ କର୍ମୀମାନେ ରାଣୀ ମନୋଜାଙ୍କ କୁଶପୁତ୍ତଳିକା ଦାହ କରିଥିଲେ ।
ପୂର୍ବତନ ବିଧାୟକ ଚିତ୍ତରଂଜନ ଷଡ଼ଙ୍ଗୀଙ୍କ ନେତୃତ୍ୱରେ ଏହି ବିକ୍ଷୋଭ କରାଯାଇଥିଲା । ତୁରନ୍ତ ରାଣୀଙ୍କ ପ୍ରାର୍ଥୀପତ୍ର ପ୍ରତ୍ୟାହାର ପାଇଁ ଦାବି କରିବା ସହ ରାଣୀ ମନୋଜାଙ୍କ ବିରୋଧରେ ସ୍ଳୋଗାନ ଦେଇଥିଲେ ।
ବାଲେଶ୍ୱରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
