ବାଲେଶ୍ବର: ଫନି ପ୍ରଳୟରେ ଛିନଛତର ଜିଲ୍ଲାର ଖଇରା ବ୍ଲକ । ଟିଣ ଉଡିଯାଇଛି । ଛାତ ଭାଙ୍ଗିଯାଇଛି । ବଡ ବଡ ଗଛ ଶୋଇପଡିଛି । କାନ୍ଥ ପଡି ଗାଈଗୋରୁ ମୃତ । ବିଦ୍ୟୁତ ଖୁଣ୍ଟ ଉପୁଡି ବିଦ୍ୟୁତ ସରବରାହ ବନ୍ଦ । ଯାତାୟତ ଠପ । ଆଦି ବିଭିନ୍ନ କାରଣରୁ ଲକ୍ଷ ଲକ୍ଷର କ୍ଷତି ସହିଛନ୍ତି ଖଇରା ଗ୍ରାମବାସୀ ।
ସରିଗଲା ଫନି । ହେଲେ ଛାଡି ଦେଇଗଲା ଅମାପ କ୍ଷୟକ୍ଷତିର ଦୁଃଖ । ଫନି ପ୍ରଭାବରେ ଖଇରା ବ୍ଲକର ବିଭିନ୍ନ ପଞ୍ଚାୟତର ବହୁ ଲୋକ ନାନା ସମସ୍ୟାର ସମ୍ମୁଖୀନ ହୋଇଛନ୍ତି । ଆନ୍ଦୋଳା ଗ୍ରାମର କମଳା କାନ୍ତ ଜେନାଙ୍କ ଘର ଉପରେ ଗଛ ପଡ଼ି ନଷ୍ଟ ହୋଇଛି । ମାଣିତ୍ରୀ ପଞ୍ଚାୟତ ଜଳଙ୍ଗ ଗ୍ରାମରେ ୪ପରିବାରର ଛପର ଉଡ଼ି ଯାଇଥିବାବେଳେ ଚଣ୍ଡୀ ମନ୍ଦିରର ମାଇକ ଉଡ଼ିଯାଇଛି ।
ସେପଟେ ସାରକୋଣା ଗ୍ରାମର ନବ କିଶୋର ମହାରଣାଙ୍କ ଘର ନଷ୍ଟ ହୋଇଛି । ନୟାଖଣ୍ଡି ଗୋଳାଗଡ଼ିଆ ଗାଁରେ କାନ୍ଥ ପଡ଼ି କୁଶ ଦାସଙ୍କ ଗାଈର ମୃତ୍ୟୁ ହୋଇଛି । ସେହିପରି ସାରଡ଼ାଙ୍ଗ, ସୁଣ୍ଡିରା, ବାଉଁଶ ଗଡ଼ିଆ, କୁପାରି, ତୁରିଗଡ଼ିଆ ସମେତ ବିଭିନ୍ନ ପଞ୍ଚାୟତରେ ବିଦ୍ୟୁତ ଖୁଣ୍ଟି ଉପୁଡିବା ଯୋଗୁଁ ବିଦ୍ୟୁତ ସରବରାହ ବାଧା ପ୍ରାପ୍ତ ହୋଇଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
