ବାଲେଶ୍ବର: କୋରୋନା ସଂକ୍ରମଣ ବୃଦ୍ଧି ପାଉଥିବାବେଳେ ରାଜ୍ୟରେ ଲକଡାଉନକୁ ମଧ୍ୟ କଡାକଡି କରାଯାଇଛି । ଏଥିମଧ୍ୟରୁ ବାଦ ପଡିନି ବାଲେଶ୍ବର ଜିଲ୍ଲା । ଦିନ 12 ପରେ ଶୁନଶାନ ହୋଇଯାଉଛି ରାସ୍ତାଘାଟ । ହେଲେ ଏହି ସମୟରେ ବାଲେଶ୍ବର ସହରର ରାଜାବଗିଚା ସ୍ଥିତ ରାସ୍ତାକଡ଼ରୁ ଭାସି ଆସୁଛି ସୁମଧୁର ବଂଶୀ ସ୍ୱର । ଏହି ବ୍ୟକ୍ତି ଜଣଙ୍କ ସହରର ନୀରବତାକୁ ଭେଦି ନିଜ ବଂଶୀ ସ୍ୱରରେ ସମସ୍ତଙ୍କୁ କରୁଛନ୍ତି ମୁଗ୍ଧ । ନିମଗ୍ନ ହୋଇ ଭିନ୍ନ ଏକ ଦୁନିଆରେ ହଜିଯିବା ପରି ଲାଗୁଛନ୍ତି ସେ । ତେବେ ସେହି ବ୍ୟକ୍ତି ଜଣଙ୍କ ହେଲେ ବଂଶୀ ବାଦକ ଉମାକାନ୍ତ ନାୟକ ।
ସୂଚନାନୁସାରେ, ଲୁହାର ଏକ ନଳୀକୁ ବଂଶୀର ରୂପ ଦେଇଥିବା ଉମାକାନ୍ତ କେତେବେଳେ ନିରବତାକୁ ବଂଶୀ ସ୍ୱରରେ ହଜାଇ ଦିଅନ୍ତି ତ ପୁଣି କେତେବଳେ ଦୁନିଆର କୋଳାହଳରେ ନିଜକୁ ବଂଶୀ ବାଦନରେ ହଜାଇ ଦିଅନ୍ତି । ଉମାକାନ୍ତ ବୃତ୍ତିରେ ଜଣେ ରାଜମିସ୍ତ୍ରୀ ହୋଇଥିବାବେଳେ ତାଙ୍କ ଘର ସଦର ବ୍ଲକ ଚାନ୍ଦିପୁର ଅଞ୍ଚଳରେ । କୋରୋନା କଟକଣା ପାଇଁ ଏବେ ବୃତ୍ତିଗତ ଜୀବନ ବାଧାପ୍ରାପ୍ତ ହୋଇଥିବା ଯୋଗୁଁ ଏକାକୀ ବସି ନିଜର କଳାକୁ ସେ ନିଖୁଣ କରୁଥିବା ଜଣାପଡିଛି ।
ବାଲେଶ୍ବରରୁ ଜୀବନ ଜ୍ୟାେତି ନାୟକ, ଇଟିଭି ଭାରତ
