ବାଲେଶ୍ବର: ପଦାରେ ପଡିଲା ଡାକ୍ତର ଓ କର୍ମଚାରୀଙ୍କ କଳି । ଉଭୟ ନିଜର ପଦ ମର୍ଯ୍ୟାଦା ଭୁଲି ପରସ୍ପରକୁ ଅଶ୍ଲୀଳ ଭାଷାରେ ଗାଳି ଗୁଲଜ କରୁଥିବା ଦେଖିବାକୁ ମିଳିଛି । ଏହି କଳିର ଏକ ଭିଡିଓ ଏବେ ସୋସିଆଲ ମିଡିଆରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।
ସୂଚନାନୁସାରେ, ସୋର ଡାକ୍ତରଖାନାର ସ୍ତ୍ରୀ ରୋଗ ବିଶେଷଜ୍ଞ ଡା. ଦୁର୍ଗାଶଙ୍କର ଦାସ ଓ ରେଡ଼ିଓଜିଲିଷ୍ଟ ରମାକାନ୍ତ ତ୍ରିପାଠୀଙ୍କ ମଧ୍ୟରେ କୌଣସି କଥାକୁ ନେଇ ବଚସା ହୋଇଥିଲା । ଡ୍ୟୁଟି ସାରି ଫେରୁଥିବା ବେଳେ ଡାକ୍ତର ଓ କର୍ମଚାରୀଙ୍କ ମଧ୍ୟରେ ଆରମ୍ଭ ହୋଇଥିଲା ଝଗଡା । ଝଗଡା ଏମିତି ଥିଲା ଯେ ସର୍ବସମ୍ମୁଖରେ ଉଭୟ ପରସ୍ପରଙ୍କୁ ଅଶ୍ଳୀଳ ଭାଷାରେ ଗାଳିଗୁଳଜ କରୁଥିବା କଥାକୁ ମଧ୍ୟ ଅନୁଭବ କରି ପାରିନଥିଲେ । ମେଡିକାଲ ସମ୍ମୁଖରେ କାହାର କେତେ ଦମ ଅଛି ସେ ବିଷୟରେ ଉଭୟ ଉଭୟଙ୍କୁ ଆଙ୍ଗୁଳି ନିର୍ଦ୍ଦେଶ କରୁଥିବା ଭିଡ଼ିଓରେ ଦେଖିବାକୁ ମିଳିଛି । ତେବେ ଜଣେ ଡାକ୍ତର ଓ କର୍ମଚାରୀଙ୍କ ଏଭଳି ଝଗଡା ବର୍ତ୍ତମାନ ସୋର ଅଞ୍ଚଳରେ ସେମାନଙ୍କ ବ୍ୟବହାର ଓ ଶାଳିନତା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ତେବେ ଉଭୟ ଝଗଡାର କାରଣ ଜଣାପଡିନଥିବା ବେଳେ ଏ ଦିଗରେ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାର ଆବଶ୍ୟକତା ରହିଛି ବୋଲି ସାଧାରଣରେ ମତ ପ୍ରକାଶ ପାଇଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
