ବାଲେଶ୍ବର: ଦେଶରେ କୋରୋନା ସଙ୍କଟ ମଧ୍ୟରେ ଠପ୍ ହୋଇଯାଇଛି ଲୋକଙ୍କ ଜୀବନ ଜୀବିକା । ଯେଉଁମାନଙ୍କ ପାଖରେ ରାସନ କାର୍ଡ ରହିଛି ସେମାନଙ୍କୁ ଚାଉଳ ଡାଲି ଯୋଗାଇ ଦେବାକୁ ସରକାର କରିଛନ୍ତି ଯୋଜନା । ହେଲେ ଏବେ ବି ଅନେକ ଲୋକ ରାସନ କାର୍ଡରୁ ବଞ୍ଚିତ ରହିଛନ୍ତ । ଖାଦ୍ୟ ସୁରକ୍ଷା ଆଇନରେ ରାସନ କାର୍ଡ ପାଇଁ ଆବେଦନ କରିଥିବା ତଥା ବଞ୍ଚିତ ହୋଇଥିବା ହିତାଧିକାରୀମାନଙ୍କୁ ତୁରନ୍ତ ଖାଦ୍ୟ ଯୋଗାଇଦେବାକୁ ଦାବି କରିଛନ୍ତି ନୀଳଗିରିର ପୂର୍ବତନ ବିଧାୟକ ଚିତ୍ତରଞ୍ଜନ ଷଡଙ୍ଗୀ ।
ବାଲେଶ୍ଵର ଜିଲ୍ଲା ନୀଳଗିରି ଉପଖଣ୍ଡର ପ୍ରାୟ ୫ ହଜାରରୁ ଅଧିକ ପରିବାରଙ୍କ ରାସନ କାର୍ଡ ନଥିବା ଯୋଗୁଁ ଏହି କରୋନା ମହାମାରୀ ସମୟରେ ସେମାନେ ସରକାରୀ ସହାୟତା ପାଇବାରୁ ବଞ୍ଚିତ ହେଉଛନ୍ତି ବୋଲି ସେ ଅଭିଯୋଗ କରିଛନ୍ତି । ତୁରନ୍ତ ଏମାନଙ୍କୁ ଖାଦ୍ୟ ଯୋଗାଇ ଦେବାପାଇଁ ପୂର୍ବତନ ବିଧାୟକ ନୀଳଗିରି ଉପଜିଲ୍ଲାପାଳଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଛନ୍ତି । 7 ଦିନ ଭିତରେ ପ୍ରଶାସନ ଏ ଦିଗରେ ଦୃଷ୍ଟି ନଦେଲେ ପୂର୍ବତନ ବିଧାୟକ ନିଜ ଘରେ ଆମରଣ ଅନଶନ କରିବେ ବୋଲି ଚେତାବନୀ ଦେଇଥିବା ଜଣାପଡ଼ିଛି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
