ବାଲେଶ୍ବର : ଗତ ଉପନିର୍ବାଚନ ସମୟରେ ବାଲେଶ୍ବରର ଦାୟିତ୍ବ ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗ୍ରହଣ କରିବେ ବୋଲି ଜିଲ୍ଲାବାସୀଙ୍କୁ ପ୍ରତିଶୃତି ଦେଇଥିଲେ l ତାଙ୍କର ପ୍ରତିଶୃତି ଉପରେ ବାଲେଶ୍ବରବାସୀ ଆସ୍ଥା ପ୍ରକଟ କରିଥିଲେ । ବିଜେଡ଼ି ପ୍ରାର୍ଥୀଙ୍କୁ ଆଶାତୀତ ସମର୍ଥନ କରି ଜିତାଇଥିଲେ l ମୁଖ୍ୟମନ୍ତ୍ରୀ ବାଲେଶ୍ବରର ଦାୟିତ୍ବ ଗ୍ରହଣ କରିବା ପରଠାରୁ ଶାନ୍ତିପ୍ରିୟ ବାଲେଶ୍ବର ସହର ଅଶାନ୍ତ ହୋଇପଡିଛି । ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ଆଇନ ଶୃଙ୍ଖଳାକୁ ନିୟନ୍ତ୍ରଣ କରିବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି। ଏପରି ଅଭିଯୋଗ ଆଣିଛି ବାଲେଶ୍ଵର ଜିଲ୍ଲା କଂଗ୍ରେସ। ସାମ୍ବାଦିକ ସମ୍ମିଳନୀ କରି ବିଜେଡି ଉପରେ ବର୍ଷିଛି କଂଗ୍ରେସ ।
ଏହାସହ ବିଗତ ୨ ମାସ ମଧ୍ୟରେ ୧୫ରୁ ଅଧିକ ଗୁଳିକାଣ୍ଡ ହୋଇଛି । ୩ ଦିନ ତଳେ ସହର ଉପକଣ୍ଠ ବାଲିଘାଟରେ ଗୁଳିକାଣ୍ଡ ଘଟିବା, ବାଲିଘାଟ ଘଟଣାକୁ 24 ଘଣ୍ଟା ନପୂରୁଣୁ ଗଡ଼ଗଡ଼ିଆ ଛକ ନିକଟରେ ଗୁଳିକାଣ୍ତ ଘଟିଥିଲା । ପୁଣି ଚାନ୍ଦିପୁରସ୍ଥିତ ନୂଆପାଳଗଡି ନିକଟରେ ଜଣେ ଜଣାଶୁଣା ଟ୍ରଲର ମାଲିକଙ୍କୁ ଗୁଳି କରି ଦୁବୃର୍ତ୍ତମାନେ ହତ୍ୟା କରିଛନ୍ତି ।
