ବାଲେଶ୍ବର: ପୋଲିସ ଜାଲରେ ବଡ ମାଛ। ବାଲେଶ୍ବରର ଜଳେଶ୍ବର ଅଞ୍ଚଳରେ ଧଳା ଜହର କାୟା ବିସ୍ତାର କରି ଚାଲିଥିବା ବେଳେ ଏହାର କିଙ୍ଗପିନ ଏବେ ପୋଲିସ ହାବୁଡରେ। ମାଷ୍ଟର ମାଇଣ୍ଡ ଶେଖ ସାଦିକ ଓରଫ ଚୁଇଁ ସହ ଅନ୍ୟ 2 ଜଣଙ୍କୁ ଗିରଫ କରିଛି ଜଳେଶ୍ବର ପୋଲିସ।
40 ଲକ୍ଷ ଟଙ୍କାର ବ୍ରାଉନସୁଗାର ଜବତ, 3 ଗିରଫ
ଅଭିଯୁକ୍ତ ପାଖରୁ 400 ଗ୍ରାମର ବ୍ରାଉନସୁଗାର ଜବତ କରାଯାଇଛି ଯାହାର ଆନୂମାନିକ ମୂଲ୍ୟ 40 ଲକ୍ଷ ଟଙ୍କା ହେବ। ଏହାସହ ଗୋଟିଏ ସ୍କୁଟି, 4ଟି ମୋବାଇଲ ଓ ନଗଦ 17 ହଜାର ଟଙ୍କା ଜବତ କରାଯାଇଛି।
ବିଶେଷ ସୂତ୍ରରୁ ଖବର ପାଇ ଜଳେଶ୍ବର ଆଇଆଇସି ଧନେଶ୍ବର ସାହୁଙ୍କ ନେତୃତ୍ବରେ ଏକ ସ୍ବତନ୍ତ୍ର ଟିମ ଜଳେଶ୍ବର ଶେଖବାଡ଼ ଅଞ୍ଚଳରେ ଚଢ଼ାଉ କରିଥିଲା। ପଶ୍ଚିମବଙ୍ଗର ଏଗ୍ରା ଅଞ୍ଚଳର ଦୁଇ ଯୁବକ ଜୋନି ସିଂ ଓ ଅଭିକ ମାଇତି ସାଦିକ ଠାରୁ ବ୍ରାଉନସୁଗାର ନେବା ବେଳେ ପୋଲିସ ଚଢ଼ାଉ କରିଥିଲା ।
ବାଲେଶ୍ବରରୁ ଜୀବନ ଜ୍ୟୋତି ନାୟକ,ଇଟିଭି ଭାରତ
