ବାଲେଶ୍ୱର: ଟାଉନ ପୋଲିସକୁ ସଫଳତା । ଏକ ବଡ ଧରଣର ଡକାୟତି ଯୋଜନା ଚାଲିଥିବା ବେଳେ ଉଦ୍ୟମକୁ ବିଫଳ କରିଛି ପୋଲିସ । ଅପରାଧୀମାନଙ୍କୁ ଗିରଫ କରିବା ସହ ବନ୍ଧୁକ ଓ ବିଭିନ୍ନ ମାରଣାସ୍ତ୍ର ଜବତ କରିବାରେ ସଫଳ ହୋଇଛି। ଏନେଇ ସୋମବାର ଟାଉନ ଥାନାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏହି ସୂଚନା ଦିଆଯାଇଛି ।
ସୂଚନାନୂଯାୟୀ, ଟାଉନ ଥାନା ଅଧିନ ବାଲିଘାଟ ଶିବ ମନ୍ଦିର ପଛପଟେ 7 ଜଣ ଯୁବକ ଡକାୟତି ପାଇଁ ଯୋଜନା କରୁଥିଲେ। କୌଣସି ସୂତ୍ରରୁ ଖବର ପାଇ ଟାଉନ ଥାନା ଆଇଆଇସି ସରୋଜିନୀ ନାୟକ ସଦଳବଳ ଉକ୍ତ ସ୍ଥାନରେ ଚଢ଼ାଉ କରିଥିଲେ। ପୋଲିସକୁ ଦେଖି 3 ଜଣ ଅପରାଧୀ ଫେରାର ହୋଇଯାଇଥିବା ବେଳେ ଅନ୍ୟ 4 ଡକାୟତ ପୋଲିସ ହାତରେ ଧରା ପଡ଼ିଛନ୍ତି।
ତେବେ ସେମାନଙ୍କ ନିକଟରୁ 5ଟି ବାଇକ, ଗୋଟିଏ 6 ରାଉଣ୍ଡ ବନ୍ଧୁକ, 3ଟି ଗୁଳି, 4ଟି ମୋବାଇଲ ଓ 3920 ଟଙ୍କା ସହ ବିପୁଳ ପରିମାଣର ମାରଣାସ୍ତ୍ର ଜବତ କରିଛି ପୋଲିସ। ସହରର ବ୍ୟବସାୟ ପ୍ରତିଷ୍ଠାନ ଉପରେ ସେମାନଙ୍କ ନଜର ଥିବା ପୋଲିସ ଜେରା ସମୟରେ ଜାଣିବାକୁ ପାଇଛି। ଗିରଫ ଅପରାଧୀମାନେ ପରଞ୍ଜୟ ଦାସ, ସୁରେଶ ଜେନା, ଜ୍ୟୋତିରଞ୍ଜନ ପୁହାଣ ଓ ମନୋଜ କୁମାର ଦାସ ବୋଲି ଜଣାପଡ଼ିଛି।
ତେବେ ନିର୍ବାଚନ ସମୟ ଥିବାବେଳେ କୌଣସି ରାଜନୈତିକ ଆକ୍ରୋଶ ପାଇଁ ଯୋଜନା ଚାଲିଥିବା ନେଇ ସ୍ପଷ୍ଟ କରିଛି ପୋଲିସ । ଗିରଫ ଅଭିଯୁକ୍ତମାନଙ୍କ ନାଁରେ ବିଭିନ୍ନ ଥାନାରେ ଅନେକ ଅପରାଧିକ ମାମଲା ରହିଥିବା ପୋଲିସ କହିଛି । ବାଲେଶ୍ୱର ସହରରେ ଏମିତି ଗ୍ୟାଙ୍ଗ ସକ୍ରିୟ ଥିବା ବେଳେ ପୋଲିସ ସେମାନଙ୍କ ଉପରେ ତୀକ୍ଷ୍ମ ନଜର ରଖିଛି ।
ଏହି ସାମ୍ବାଦିକ ସମ୍ମିଳନୀରେ ଆଡ଼ିସିନାଲ ଏସପି ତପନ କୁମାର ପଟ୍ଟନାୟକ, ଡିଏସପି ଉମେଶ କୁମାର ପଣ୍ଡା, ଟାଉନ ଥାନା ଆଇଆଇସି ସରୋଜିନୀ ନାୟକ ପ୍ରମୁଖ ଉପସ୍ଥିତ ଥିଲେ।
ବାଲେଶ୍ୱରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
