ବଲାଙ୍ଗୀର: କୋରୋନା ସଂକ୍ରମଣ ରୋକିବା ପାଇଁ ସରକାର ବିଭିନ୍ନ ଗାଇଡଲାଇନ ଓ ସଚେତନତା କାର୍ଯ୍ୟ ହାତକୁ ନେଉଥିବା ସତ୍ତ୍ବେ ବଲାଙ୍ଗୀର ଜିଲ୍ଲାରେ କଳାସୀ ଯାତ୍ରା ଉପଲକ୍ଷେ ମେଣ୍ଢା ମାଡ଼ର ଆୟୋଜନ ହୋଇଛି। ଏଥିରେ ହଜାର ହଜାର ଲୋକ ସାମିଲ ହୋଇ କରୋନା ନିୟମକୁ ଖୋଲାଖୋଲି ଉଲ୍ଲଙ୍ଘନ କରିଥିବାର ଦେଖାଯାଇଛି ।
ଜିଲ୍ଲାର ଛତା ପିପଲ ଗ୍ରାମରେ କଳାସୀ ଯାତ୍ରା ଚାଲି ଥିବା ବେଳେ ଏହି ଉପଲକ୍ଷେ ମେଣ୍ଢା ମାଡ଼ ପ୍ରତିଯୋଗିତା ଆୟୋଜିତ ହୋଇଛି। ଯେଉଁଥିରେ ଶତାଧିକ ପ୍ରତିଯୋଗୀ ସାମିଲ ହୋଇଥିବା ବେଳେ ଏହି ଗାଁ ଓ ଆଖ ପାଖ ଅଞ୍ଚଳର ହଜାର ହଜାର ଲୋକ ଏହାକୁ ଦେଖିବା ପାଇଁ ରୁଣ୍ଡ ହୋଇଥିଲେ। ଯେଉଁଥିରେ କୌଣସି ଲୋକ ମାସ୍କ ବ୍ୟବହାର କରିନ ଥିବା ବେଳେ ସାମାଜିକ ଦୂରତାକୁ ମଧ୍ୟ ସମସ୍ତେ ଭୁଲି ଯାଇଥିଲେ।
ତେବେ ସରକାର ଓ ପ୍ରଶାସନର କଡା ନିୟମ ଓ ସଚେତନତା ସତ୍ତ୍ବେ କେମିତି ଏତେବଡ ଆୟୋଜନ ହେଲା ଓ ସ୍ଥାନୀୟ ପୋଲିସ୍ କିମ୍ବା ପ୍ରଶାସନ କେମିତି ଜାଣି ପାରିଲା ନାହିଁ ତାକୁ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ। ଏସମ୍ପର୍କରେ ଖବର ପ୍ରସାରଣ ହେବା ପରେ ପୋଲିସ ଓ ଜିଲ୍ଲା ପ୍ରଶାସନ କି ପଦକ୍ଷପ ନେଉଛି ତାହା ଦେଖିବାକୁ ବାକି ରହିଲା ।
ବଲାଙ୍ଗୀରରୁ ଶେକ ମହମ୍ମଦ ଓ୍ବାହିଦ, ଇଟିଭି ଭାରତ
