ବଲାଙ୍ଗୀର: ବନ୍ଦ ଘରୁ ସନ୍ଦିଗ୍ଧ ଅବସ୍ଥାରେ ଯୁବକଙ୍କ ମୃତଦେହ ଉଦ୍ଧାର ହୋଇଛି । ତେବେ ମୃତ୍ୟୁକୁ ସହଜରେ ଗ୍ରହଣ କରିପାରୁନାହାନ୍ତି ପରିବାର ଲୋକେ । ବାପାଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ କରିଛି ପୁଅ । ବଲାଙ୍ଗୀର ସଦର ଥାନା ଅନ୍ତର୍ଗତ ତୁଲବନ୍ଦୀ ଗ୍ରାମରେ ଏଭଳି ଅଭାବନୀୟ ଘଟଣା ଘଟିଥିବା ବେଳେ ଜଣେ ମହିଳାଙ୍କ ବିରୁଦ୍ଧରେ ଅଭିଯୋଗ ଆଣିଛନ୍ତି ପରିବାର । ଅଭିଯୋଗ କ୍ରମେ ପୋଲିସ ମୃତଦେହ ଜବତ କରି ତଦନ୍ତ ଆରମ୍ଭ କରିଛି ।
ଏହା ମଧ୍ୟ ପଢନ୍ତୁ: ରାତି ପାହିଲେ ଝାରସୁଗୁଡା ରେଜଲ୍ଟ: ବିଜୟ ପାଇଁ ତିନି ଦଳର ଦୃଢୋକ୍ତି, ଫଳାଫଳ ନେଇ ଚାଲିଛି ଅଙ୍କକଷା
ସଦର ଥାନା ଅନ୍ତର୍ଗତ ତୁଲବନ୍ଦୀ ଗ୍ରାମରୁ ଏହି ଅଭିଯୋଗ ଆସିଛି । ଏହି ଗ୍ରାମର ଅରୀକ୍ଷିତ ଭୁଏଁ ଘରେ ଏକା ରହୁଥିଲେ । ତେବେ ଦୁଇ ଗତଦିନ ତଳେ ଘରର କବାଟ ଝରକା ବନ୍ଦ ଥିବାରୁ ସ୍ଥାନୀୟ ଲୋକଙ୍କ ସନ୍ଦେହ ବଢିଥିଲା । ଏନେଇ ସ୍ଥାନୀୟ ଲୋକେ ବାହାର ରାଜ୍ୟରେ କାମ କରୁଥିବା ତାଙ୍କ ପୁଅକୁ ଖବର ଦେଇଥିଲେ । ଗତକାଲି (ଗୁରୁବାର) ତାଙ୍କ ପୁଅ ଗାଁକୁ ଆସିବା ପରେ ପୋଲିସକୁ ଖବର ଦେଇଥିଲେ । ଏହାପରେ ପୋଲିସ ଆସିବା ପରେ ଘରର କବାଟ ଖୋଲାଯାଇଥିଲା । କବାଟ ଖୋଲିଲା ବେଳକୁ ମୃତଦେହ ପଡି ରହିଥିବା ଦେଖିବାକୁ ମିଳିଥିଲା । ଏହାପରେ ପୋଲିସ ମୃତଦେହକୁ ଉଦ୍ଧାର କରି ତଦନ୍ତ ଆରମ୍ଭ କରିଥିବା ଜଣାପଡିଛି । ସେପଟେ ବାପାଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରୁନି ପୁଅ । ଅରକ୍ଷୀତଙ୍କ ପୁଅ ପ୍ରଶାନ୍ତ ଭୁଏ ତାଙ୍କ ବାପାଙ୍କୁ ହତ୍ୟା କରିଥିବାର ଅଭିଯୋଗ ଆଣିଛନ୍ତି ।
ଏହା ମଧ୍ୟ ପଢନ୍ତୁ: Cyclone Mocha Update: ଅତି ଭୀଷଣ ବାତ୍ୟାର ରୂପ ନେଲେ ବାତ୍ୟା ମୋକା
ଦୁଇ ଦିନ ତଳେ ଜଣେ ମହିଳା ତାଙ୍କ ଘରକୁ ଆସିଥିଲା । ଯାହାପରେ ତାଙ୍କ ଘରକୁ ଆଉ କେହି ଯିବା ଆସିବା କରିନଥିବା ବେଲେ ସେହି ମହିଳା ଜଣକ ହିଁ କୌଣସି କାରଣରୁ ହତ୍ୟା କରିଥିବାର ସେ କହିଛନ୍ତି । ତେଣୁ ସମ୍ପୃକ୍ତ ମହିଳାଙ୍କୁ ପୋଲିସ ପଚାରିଲେ ସବୁ ସତ୍ୟ ସାମ୍ନାକୁ ଆସିବ ବୋଲି ସେ କହିଛନ୍ତି । ତେବେ ଏହି ଘଟଣାରେ ସଦର ପୋଲିସ ତଦନ୍ତ ଜାରି ରଖିଥିବା ବେଳେ ମୃତଦେହ ବ୍ୟବଚ୍ଛେଦ ରିପୋର୍ଟ ଆସିଲା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ସୂଚନା ଦେଇଛି । ସେହିପରି ଅଭିଯୋଗ କ୍ରମେ ସ୍ଥାନୀୟ ବାସିନ୍ଦାଙ୍କୁ ପଚରାଉଚରା ଜାରି ରଖିଛି ପୋଲିସ ।
ଇଟିଭି ଭାରଚ, ବଲାଙ୍ଗୀର
