ବଲାଙ୍ଗୀର: କଳାହାଣ୍ଡି ସନସାଇନ ସ୍କୁଲର ଶିକ୍ଷୟିତ୍ରୀଙ୍କ ହତ୍ୟାକାଣ୍ଡ ଘଟଣାକୁ ନେଇ ଆଜି (ବୁଧବାର) ବଲାଙ୍ଗୀର AIDSO ସଙ୍ଗଠନ ପକ୍ଷରୁ ଏସପିଙ୍କ କାର୍ଯ୍ୟାଳୟ ଘେରାଉ କରିଛି । ଯେଉଁଥିରେ ଶତାଧିକ ଛାତ୍ରଛାତ୍ରୀ ସାମିଲ ହୋଇଥିଲେ । ତେବେ ମମିତା ମେହେରଙ୍କୁ ହତ୍ୟା କରିଥିବା ଅଭିଯୋଗରେ ଗୋବିନ୍ଦ ସାହୁଙ୍କୁ କଠୋର ଦଣ୍ଡ ଦେବା ପାଇଁ ଦାବି କରିଛନ୍ତି । ସେହିପରି ଏଥିରେ ରାଜ୍ୟ ଗୃହ ମନ୍ତ୍ରୀ ଦିବ୍ୟଶଙ୍କରଙ୍କ ସମ୍ପୃକ୍ତି ଥିବା ଅଭିଯୋଗ ଆଣି ତାଙ୍କୁ ମଧ୍ୟ ଶୀଘ୍ର ବରଖାସ୍ତ କରିବା ସହ ଗିରଫ କରିବାକୁ ସଙ୍ଗଠନ ପକ୍ଷରୁ ଦାବି ହୋଇଛି ।
ସେପଟେ ମନ୍ତ୍ରୀଙ୍କ ପ୍ରରୋଚନାରେ ବଲାଙ୍ଗୀର ପୋଲିସ ଏହି ମାମଲା ଚାପି ଦେବାକୁ ଉଦ୍ୟମ କରୁଥିବାରୁ ସେମାନଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଦାବି କରିଛି ଦଳ । ଆଉ ଏଥିପାଇଁ ସେମାନେ ଆସନ୍ତାକାଲି (ଗୁରୁବାର) ବଲାଙ୍ଗୀର ଜିଲ୍ଲାରେ ୧୨ଘଣ୍ଟିଆ ବନ୍ଦ ଡାକରା ଦେଇଛନ୍ତି । ତେବେ ପୂର୍ବରୁ ଜିଲ୍ଲା ବିଜେପି ବନ୍ଦ ଡାକରା ଦେଇଥିବାବେଳେ ଏବେ AIDSO ଓ AIMSS ମଧ୍ୟ ଏହି ବନ୍ଦ ଡାକରା ଦେଇଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
