ବଲାଙ୍ଗୀର: ଶିକ୍ଷୟିତ୍ରୀ ମମିତା ମେହେର ହତ୍ୟା ଘଟଣାର ପର୍ଦ୍ଦାଫାଶ କରିବା ସହ ମୁଖ୍ୟ ଅଭିଯୁକ୍ତକୁ ଗିରଫ କରିଛି ପୋଲିସ । ସେପଟେ ମୃତକଙ୍କ ପରିବାର ଲୋକେ ବଲାଙ୍ଗୀର ଏସପି ଓ ଡିଆଇଜିଙ୍କୁ ସାକ୍ଷାତ କରି ଉଚିତ ନ୍ୟାୟ ପାଇଁ କରିଛନ୍ତି ଦାବି । ମମିତାଙ୍କ ହତ୍ୟା ଘଟଣା ସମ୍ପର୍କରେ ବୁଧବାର ପୋଲିସ ଖୁଲାସା କରିଛି । ଯୋଜନାବଦ୍ଧ ଷଡଯନ୍ତ୍ର ଭାବରେ ମମିତାଙ୍କ ହତ୍ୟା କରାଯାଇଥିବା କହିଛି ପୋଲିସ ।
ମଙ୍ଗଳବାର ମୁଖ୍ୟ ଅଭିଯୁକ୍ତ ତଥା କଳାହାଣ୍ଡି ଜିଲ୍ଲା ମହାଲିଙ୍ଗ ସ୍ଥିତ ସ୍କୁଲର ପରିଚାଳକ ଗୋବିନ୍ଦ ସାହୁକୁ ଗିରଫ କରିଥିଲା ପୋଲିସ । ଗୋବିନ୍ଦକୁ କୋର୍ଟ ଚାଲାଣ ପରେ ପାଞ୍ଚ ଦିନିଆ ରିମାଣ୍ଡରେ ଆଣି ପୋଲିସ ଅଧିକ ତଦନ୍ତ ଜାରି ରଖିଛି । ସେପଟେ ମୃତ ମମିତାଙ୍କ ପରିବାର ଲୋକେ ବଲାଙ୍ଗୀର ଆସି ଏସପି ଓ ଡିଆଇଜିଙ୍କୁ ଭେଟିଛନ୍ତି ।
ପୋଲିସର ଏହି ତ୍ୱରିତ ପଦକ୍ଷେପରେ ସନ୍ତୁଷ୍ଟ ଥିବାବେଳେ ତାଙ୍କ ପକ୍ଷରୁ ଯଥା ସମ୍ଭବ ସହଯୋଗ କରି ଆସୁଥିବାର କହିଛନ୍ତି ପରିବାର ଲୋକେ । ସେହିପରି ଆଗକୁ ମଧ୍ୟ ସେମାନେ ପୋଲିସକୁ ସହଯୋଗ କରିବେ ବୋଲି କହିଛନ୍ତି । ତେବେ ତାଙ୍କ ଝିଅକୁ ଉଚିତ୍ ନ୍ୟାୟ ଦାବି କରିଛନ୍ତି ମମତାଙ୍କ ପରିବାର ।
ବଲାଙ୍ଗୀରରୁ ଏସକେ ମହମ୍ମଦ ୱାହିଦ, ଇଟିଭି ଭାରତ
