ବଲାଙ୍ଗୀର: ପୋଖରୀରୁ ଜଣେ ଶିଶୁକନ୍ୟାଙ୍କ ମୃତଦେହ ଉଦ୍ଧାର । ମୃତ ଝିଅର ବାପା ନିଜ ସ୍ତ୍ରୀ ବିରୋଧରେ ହତ୍ୟା ଅଭିଯୋଗ ଆଣିଛନ୍ତି । ଏନେଇ ଥାନାରେ ଲିଖିତ ଅଭିଯୋଗ କରିଛନ୍ତି ।
ସୂଚନା ଅନୁସାରେ ବଲାଙ୍ଗୀର ଠିକାଦାରପଡାର ପ୍ରସନ୍ନ ବାଗଙ୍କ ସ୍ତ୍ରୀ ସତ୍ୟା ବାଗ ଗତ 21 ତାରିଖରେ ଘରେ ଦୁଇ ଶିଶୁକନ୍ୟାଙ୍କୁ ଛାଡି ଅନ୍ୟ ଜଣେ ବ୍ୟକ୍ତିଙ୍କ ସହ ପଳାଇଥିଲେ । ତେବେ ସେ ଗତକାଲି ଘରକୁ ଆସି ସାଙ୍ଗରେ ପାଞ୍ଚ ବର୍ଷର ସାନ ଝିଅ ସୌମ୍ୟା ବାଗକୁ ନେଇ ଯାଇଥିଲେ । ଆଜି ସୌମ୍ୟା ବାଗର ମୃତଦେହ ପୋଖରୀରୁ ମିଳିଥିଲା ।
ସେପଟେ ବାପା ପ୍ରସନ୍ନ ବାଗ ଏହାକୁ ନେଇ ନିଜ ସ୍ତ୍ରୀ ବିରୋଧରେ ଶିଶୁ କନ୍ୟାଙ୍କ ହତ୍ୟା ଅଭିଯୋଗରେ ବଲାଙ୍ଗୀର ଟାଉନ୍ ଥାନାରେ ଲିଖିତ ଅଭିଯୋଗ କରିଛନ୍ତି । ଏହି ଅଭିଯୋଗକୁ ଭିତ୍ତି କରି ବଲାଙ୍ଗୀର ପୋଲିସ ମୃତଦେହ ବ୍ୟବଚ୍ଛେଦ ପାଇଁ ପଠାଇଛି ଏବଂ ସଂପୃକ୍ତ ମହିଳାଙ୍କୁ ଅଟକ ରଖି ଅଧିକ ତଦନ୍ତ ଜାରି ରଖିଛି ।
ବଲାଙ୍ଗୀରରୁ ସେଖ ମହମ୍ମହ ୱାହିଦ, ଇଟିଭି ଭାରତ
