ବଲାଙ୍ଗୀର: ଜିଲ୍ଲାର ଉପାନ୍ତ ଅଞ୍ଚଳରୁ ଏକ ଅଭାବନୀୟ ଚିତ୍ର ସାମ୍ନାକୁ ଆସିଛି । ଜଣେ ବୃଦ୍ଧ ରୋଗିଣା ଝିଅକୁ କାନ୍ଧରେ ବୋହି ଚିକିତ୍ସା ପାଇଁ ଚାଲିଚାଲି ଯାଉଥିବା ଦେଖିବାକୁ ମିଳିଛି । ଏହି ଚିତ୍ର ପ୍ରତ୍ୟେକଙ୍କୁ ଆନ୍ଦୋଳିତ କରିଛି । ବୃଦ୍ଧ ଜଣକ ବଲାଙ୍ଗୀର ପାଟଣାଗଡ଼ ବ୍ଲକ ନେହେନାବନ୍ଦ ଗ୍ରାମର ସୁବଳ ଛତ୍ରିଆ ବୋଲି ଜଣାପଡ଼ିଛି । ତାଙ୍କ ୧୮ ବର୍ଷର ଝିଅ କୌଣସି ରୋଗରେ ପୀଡ଼ିତ ହୋଇ ଚାଲିବାକୁ ଅକ୍ଷମ ହୋଇ ପଡ଼ିଛନ୍ତି ।
ଝିଅର ଚିକିତ୍ସା ପାଇଁ ସବୁଠି ଚେଷ୍ଟା କରି ନୟାନ୍ତ ହୋଇ ପଡ଼ିଛନ୍ତି ବୃଦ୍ଧ ବାପା । ବର୍ତ୍ତମାନ ଝିଅର ଅଧିକ ଚିକିତ୍ସା ପାଇଁ ତାଙ୍କ ପାଖରେ ଆଉ ଅର୍ଥ ମଧ୍ୟ ନାହିଁ । ଫଳରେ ଝିଅର ଚିକିତ୍ସା ପାଇଁ ଝଡ଼ାଫୁଙ୍କାର ସାହାଯ୍ୟ ନେଉଛନ୍ତି ବୃଦ୍ଧ ବାପା । ଆଜି(ସୋମବାର) ପାଟଣାଗଡ଼ରୁ ସେ ବେଲପଡ଼ା ଯାଇଥିଲେ । ହେଲେ ଫେରିବା ପାଇଁ ତାଙ୍କ ପାଖରେ ଆଉ ଟଙ୍କା ନଥିଲା । ଶେଷରେ ଝିଅକୁ କାନ୍ଧରେ ନେଇ ଚିକିତ୍ସା କରାଇବାକୁ ବାହାରି ପଡ଼ିଥିଲେ ସୁବଳ ।
ସରକାରଙ୍କ ମାଳମାଳ ଯୋଜନା ସୁବଳଙ୍କ କାମରେ ଆସି ପାରୁନାହିଁ । ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ସୁବଳଙ୍କୁ ସାମିଲ କରାଯାଇନାହିଁ । ପ୍ରଶ୍ନ ଉଠୁଛି ତେବେ ସରକାର ଯୋଜନା କାହା ପାଇଁ ? ଏହାକୁ ନେଇ ସୂଚନା ମିଳିବା ପରେ ସ୍ବାସ୍ଥ୍ୟ ବିଭାଗ ସୁବଳ ଛତ୍ରିଆଙ୍କ ଝିଅଙ୍କୁ ଉଦ୍ଧାର କରି ପାଟଣାଗଡ଼ ଡାକ୍ତରଖାନାରେ ଭର୍ତ୍ତି କରିଛି । ସେଠାରେ ଝିଅର ଚିକିତ୍ସା ଆରମ୍ଭ ହୋଇଥିବା ସୂଚନା ମିଳିଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
