ବଲାଙ୍ଗିର: ରାଜ୍ୟ କେନ୍ଦୁପତ୍ରର କର୍ମଚାରୀ ସଂଘର ଉପସଭାପତିଙ୍କ ଦେହାନ୍ତ । ଆଜି(ସୋମବାର) ବଲାଙ୍ଗୀର ପାଟଣାଗଡ଼ର ବରିଷ୍ଠ କଂଗ୍ରେସ ନେତା ତଥା ରାଜ୍ୟ କେନ୍ଦୁପତ୍ରର କର୍ମଚାରୀ ସଂଘର ଉପସଭାପତି କିଶୋର ପରିଛାଙ୍କ ଦେହାନ୍ତ ହୋଇଛି।
ମୃତ୍ୟୁ ବେଳକୁ ତାଙ୍କୁ 64 ବର୍ଷ ବୟସ ହୋଇଥିଲା। ତେବେ ସେ କିଛିଦିନ ତଳେ ଅସୁସ୍ଥ ହୋଇଥିବାବେଳେ ତାଙ୍କର କୋରୋନା ସଂକ୍ରମିତ ହୋଇଥିବାର ଜଣାପଡ଼ିଥିଲା। ତାଙ୍କୁ ଯାଜପୁର ସ୍ଥିତ ଏକ ଘରୋଇ ମେଡିକାଲରେ ଭର୍ତ୍ତି କରାଯାଇ ଥିବାବେଳେ ଆଜି ତାଙ୍କର ଦେହାନ୍ତ ହୋଇଛି।
ସ୍ବର୍ଗତ କିଶୋର ପରିଛା କଂଗ୍ରେସ ଦଳର ସକ୍ରୀୟ ନେତା ହୋଇଥିବାବେଳେ କଂଗ୍ରେସ ଟିକଟରୁ ସେ ଗତ 2014 ବିଧାନସଭା ନିର୍ବାଚନରେ ପ୍ରତିଦ୍ବନ୍ଦିତା କରିଥିଲେ। ସେହିପରି ସେ କେନ୍ଦୁପତ୍ର ତୋଳାଳୀଙ୍କ ହକ ପାଇଁ ଦୀର୍ଘ ଦିନରୁ ଆନ୍ଦୋଳନ କରି ଆସୁଥିଲେ। ତେବେ ତାଙ୍କର ଅକାଳ ବିୟୋଗରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି।
ବଲାଙ୍ଗୀରରୁ ସେଖ ମହମ୍ମଦ ୱାହିଦ, ଇଟିଭି ଭାରତ
