ବଲାଙ୍ଗୀର: ପୁଣି ସାମ୍ନାକୁ ଆସିଲା ଦାଦନ ଦୁଃଖ । ଦାଦନଙ୍କ ପାଇଁ ରହିଛି ଅନେକ ଯୋଜନା । ହେଲେ ଏହି ଯୋଜନା ବଟାମାରଣା ହେଉଥିବା ଅଭିଯୋଗ ହୋଇଛି । ଏଭଳି ଅଭିଯୋଗ ଆସିଛି ବଲାଙ୍ଗୀର ବେଳପଡା ବ୍ଲକରୁ । ରାଜ୍ୟ ସରକାରଙ୍କ ଅଧିନରେ ଥିବା ନିର୍ମାଣ ଶ୍ରମିକ ଯୋଜନାରେ ଏହି ଅଞ୍ଚଳର ଦାଦନ ପଞ୍ଜିକୃତ କରିଛନ୍ତି । ହେଲେ ଏଯାଏଁ ଏହି ଯୋଜନାର ସୁବିଧା ପାଇ ନଥିବା ଅଭିଯୋଗ ହୋଇଛି ।
ନିର୍ମାଣ ଶ୍ରମିକ ଯୋଜନାରୁ ସୁବିଧା ମିଳୁ ନଥିବା ଅଭିଯୋଗ
ନିର୍ମାଣ ଶ୍ରମିକ ଯୋଜନାରେ ପଞ୍ଜିକୃତ ହୋଇଥିଲେ ମଧ୍ୟ ଅନେକଙ୍କୁ ଶ୍ରମିକ କାର୍ଡ ମଧ୍ୟ ମିଳି ନ ଥିବା ବେଳେ ନିକଟରେ ସରକାର ଦେଇଥିବା କୋଭିଡ ସହାୟତା ମଧ୍ୟ କେହି ପାଇ ନାହାନ୍ତି । କିନ୍ତୁ ଏହି ଟଙ୍କା ଏମାନଙ୍କ ନାଁରେ ଉଠାଯାଇଥିବା ଅଭିଯୋଗ ହୋଇଛି । ଏଥିରେ ଦାଦନ ସର୍ଦ୍ଦାର ଓ ବିଭାଗୀୟ ଅଧିକାରୀ ସମ୍ପୃକ୍ତି ରହିଛି ବୋଲି କହିଛନ୍ତି ଶ୍ରମିକ । ଏହାର ତଦନ୍ତ ଦାବି କରିଛନ୍ତି ସ୍ଥାନୀୟ ଲୋକେ ।
ବଲାଙ୍ଗୀରରୁ ଶେଖ ମହମ୍ମଦ ଓ୍ବାହିଦ,ଇଟିଭି ଭାରତ
