ବଲାଙ୍ଗୀର: ଆଉ ଦିନକ ପରେ ଆଲୁଅର ପର୍ବ ଦୀପାବଳି । ହେଲେ ଏଥର ଦୀପାବଳି ପଡିବ ଫିକା । କାରଣ ରାଜ୍ୟରେ ଲଗାଣ ବର୍ଷା ସାଜିଛି ବାଧକ। ବିଶେଷ କରି ଏଥିପାଇଁ ବାଣ ବ୍ୟବସାୟ ଠପ୍ ହୋଇଥିବା ବେଳେ ବ୍ୟବସାୟୀ ଚିନ୍ତାରେ ପଡ଼ି ଯାଇଛନ୍ତି । ଚଳିତ ବର୍ଷ ଏଥିଯୋଗୁଁ ବିପୁଳ କ୍ଷତି ସହିବେ ବୋଲି କହିଛନ୍ତି ବାଣ ବ୍ୟବସାୟୀ ।
ବଲାଙ୍ଗୀରରେ ଗତ ତିନି ଦିନ ହେବ ଲଗାଣ ବର୍ଷା ଜାରି ରହିଥିବା ବେଳେ କୋହଲା ପାଗ ଲାଗି ରହିଛି । ଏଥିଯୋଗୁଁ ଦୀପାବଳି ପାଳନ ମଧ୍ୟ ଫିକା ବୋଲି ଜଣାପଡୁଛି । ବିଶେଷ କରି ଦୀପାବଳିରେ ବ୍ୟବସାୟ କରି ଦୁଇ ପଇସା ରୋଜଗାର କରିବେ ବୋଲି ଯେଉଁ ଆଶା ବାନ୍ଧିଥିଲେ ବ୍ୟବସାୟୀ ତାହା ଏବେ ସମ୍ପୂର୍ଣ୍ଣ ଠପ ହୋଇପଡିଛି । ଏନେଇ ଛୋଟରୁ ବଡ଼ ବ୍ୟବସାୟୀ ଏବେ ଚିନ୍ତାରେ ପଡ଼ିଯାଇଛନ୍ତି । ସମାନ ଭାବରେ ବଲାଙ୍ଗୀରରେ ଦୁଇ କୋଟିରୁ ଊର୍ଦ୍ଧ୍ବ ବାଣ ବ୍ୟବସାୟ ହଉଥିବା ବେଳେ ଏଥର ମଧ୍ୟ ବ୍ୟବସାୟୀମାନେ ରାଜ୍ୟ ଓ ରାଜ୍ୟ ବାହାରୁ ଲକ୍ଷାଧିକ ଟଙ୍କାର ବାଣ କିଣି ଏଠାରେ ଦୋକାନ ଲଗାଇଛନ୍ତି ।
ଜିଲ୍ଲା ପ୍ରଶାସନ ଦ୍ବାରା ପ୍ରଦତ୍ତ ସ୍ଥାନ ରାଜୀବ ନଗର ସ୍ଥିତ ପଡ଼ିଆରେ 93 ଜଣ ବାଣ ବ୍ୟବସାୟୀ ଦୋକାନ ଲଗାଇଛନ୍ତି । ଫୁଲ ଝଡି ସହ ଭଳିକି ଭଳି ବାଣ ଆଣିଛନ୍ତି । ତେବେ ଦୀପବଳୀକୁ ମାତ୍ର ଆଉ ଗୋଟିଏ ଦିନ ଥିବା ବେଳେ ଏଯାଏଁ ଗ୍ରାହକଙ୍କ ଦେଖାନାହିଁ । ଦୀପାବଳି ଦିନ ଯାହା ବାଣ ବିକ୍ରି ହେବ ତାକୁ ହିଁ ଏମାନେ ଆଶା ରଖିଛନ୍ତି । ଚଳିତବର୍ଷ ବର୍ଷା ଯୋଗୁଁ ବାଣ ବ୍ୟବସାୟୀ ନିହାତି ଭାବେ ବିପୁଳ ପରିମାଣରେ କ୍ଷତି ସହିବେ ବୋଲି କହିଛନ୍ତି । ଯଦି ଦୀପାବଳି ଦିନ ଶୁଖିଲା ପାଗ ରହେ ତେବେ କିଛି ମାତ୍ରାରେ ବାଣ ବିକ୍ରି ହେବ ବୋଲି ଆଶା କରିଛନ୍ତି ବ୍ୟବସାୟୀ ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
