ବଲାଙ୍ଗୀର: ପୁଇଁତଳା ଶ୍ରୀକାନ୍ତ ହତ୍ୟା ମାମଲାରୁ ଉଠିଲା ପରଦା । ହନୁମାନ ପଇସା ପାଇଁ କରାଯାଇଥିଲା ହତ୍ୟା । ବଲାଙ୍ଗୀର ପୋଲିସ ଏହି ମାମଲାର ଫର୍ଦ୍ଦାଫାଶ କରିଛି । ଏହି ହତ୍ୟାକାଣ୍ଡରେ ପୋଲିସ 4 ଜଣଙ୍କୁ ଗିରଫ କରିଥିବା ନେଇ ବଲାଙ୍ଗୀର ଏସଡିପିଓ ସୂଚନା ଦେଇଛନ୍ତି।
ପୁରା ଘଟଣାଟି ଥିଲା ଏମିତି, ଗତ 9 ତାରିଖରେ ପୁଇଁତଳା ବ୍ଲକ ବରଗାଁର ଶ୍ରୀକାନ୍ତଙ୍କୁ ଘରକୁ ଫେରି ନଥିଲେ । ବିଳମ୍ବିତ ରାତି ପର୍ଯ୍ୟନ୍ତ ଘରକୁ ନ ଫେରିବାରୁ ପରିବାର ଲୋକଙ୍କ ସନ୍ଦେହ ହୋଇଥିଲା । ବହୁ ଖୋଜାଖୋଜି ପରେ ବି ତାଙ୍କର କୌଣସି ପତ୍ତା ମିଳି ନଥିଲା । ପର ଦିନ ପରିବାର ଲୋକେ ଥାନାରେ ଶ୍ରୀକାନ୍ତଙ୍କ ନିଖୋଜ ନେଇ ଖବର ଦେଇଥିଲେ ।
ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିଥିଲା ପୋଲିସ । ଗାଁ ନିକଟରେ ଶ୍ରୀକାନ୍ତଙ୍କ ଚଷମା ଓ ଚପଲ ପଡିଥିବା ଦେଖିବାକୁ ମିଳିଥିଲା । 10 ତାରିଖ ଦିନ ତାଙ୍କ ମୃତଦେହ ଦୁର୍ଗାପାଲି ଠାରେ ସୁକତେଲ ନଦୀରୁ ଉଦ୍ଧାର କଲା ପୋଲିସ । ଏହି ଘଟଣାରେ ତଦନ୍ତ କରି ଶ୍ରୀକାନ୍ତଙ୍କ ସମ୍ପର୍କୀୟ ସୁରେଶ ବାଘଙ୍କୁ ଅଟକ ରଖିଲା ପରେ ହତ୍ୟାର ପ୍ରକୃତ ସତ୍ୟ ଉନ୍ମୋଚନ ହୋଇଛି ।
ଶ୍ରୀକାନ୍ତଙ୍କ ଘରେ ଏକ ହନୁମାନ ପଇସା ଥିବା ନେଇ କୌଣସି ସୁତ୍ରରୁ ଜାଣିବାକୁ ପାଇଥିଲେ ସୁରେଶ । କୌଶଳ କ୍ରମେ ପଇସାଙ୍କୁ ହାତେଇବା ପାଇଁ ସେ ଚକ୍ରାନ୍ତ କରିଥିଲା । ତାଙ୍କୁ ଅପହରଣ କରି ପରିବାର ଲୋକଙ୍କ ଠାରୁ ହନୁମାନ ପଇସା ନେବା ଥିଲା ସେମାନଙ୍କ ଉଦ୍ଦେଶ୍ୟ । ଯୋଜନା ଅନୁସାରେ ସୁରେଶ କିଛି ଲୋକଙ୍କ ସହ ମିଶି ତାଙ୍କୁ ଅପହରଣ କରିଥିଲେ । ହେଲେ ସେ ମରିଯାଇଛି ଭାବି ତାଙ୍କ ମୃତଦେହକୁ ନଦୀକୁ ଫୋପାଡି ଦେଇଥିଲେ ସେମାନେ ।
ତେବେ ଏହି ଘଟଣାରେ ମୋଟ 8 ଜଣଙ୍କ ସମ୍ପୃକ୍ତି ଥିବା ଜାଣିବାକୁ ପାଇଛି ପୋଲିସ । ସେମାନଙ୍କ ମଧ୍ୟରୁ ମୁଖ୍ୟ ଅଭିଯୁକ୍ତ ସହ ମୋଟ 4 ଜଣଙ୍କୁ ଗିରଫ କରିବାରେ ସଫଳ ହୋଇଛି ପୋଲିସ ଅନ୍ୟମାନେ ଫେରାର ଅଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ୍, ଇଟିଭି ଭାରତ
