ବଲାଙ୍ଗୀର: ବଲାଙ୍ଗୀର ପୋଲିସକୁ ଏକ ବଡ଼ ସଫଳତା ମିଳିଛି । ଯେଉଁଥିରେ ବଲାଙ୍ଗୀର ପୋଲିସ୍ ତିନିଜଣ ଆନ୍ତରାଜ୍ୟ ଲୁଟେରାକୁ ନେପାଳ ସୀମାରୁ ଗିରଫ କରିବାରେ ସଫଳ ହୋଇଛି । ସୂଚନା ଅନୁସାରେ ଗତ 15 ତାରିଖରେ ବଲାଙ୍ଗୀର ସହର ମଧ୍ୟରେ ଥିବା ଏକ ବଡ଼ ମୋବାଇଲ ହୋଲସେଲ ଦୋକାନରୁ 40 ଲକ୍ଷ ଟଙ୍କାର ମୋବାଇଲ ଲୁଟ ହୋଇଥିବାର ଅଭିଯୋଗ ହୋଇଥିଲା । ତେବେ ବଲାଙ୍ଗୀର ପୋଲିସର ଏକ ସ୍ବତନ୍ତ୍ର ଟିମ୍ ଏହାର ତଦନ୍ତ କରୁଥିବା ବେଳେ ବିହାରର ନେପାଲ ସୀମାରୁ ତିନି ଜଣ ଅଭିଯୁକ୍ତକୁ ଏଥିରେ ଗିରଫ କରିଛି ।
ତେବେ ବିହାର ରାଜ୍ୟ ରୋହତସ ଜିଲ୍ଲାର କହ୍ନେୟା କୁମାର (50 ବର୍ଷ), ଘୋଡ଼ା ସହଁନ ଜିଲ୍ଲାର ମିରାଜ୍ ଅନସାରୀ (ବୟସ 50) ଓ କୌଶର ଆଲମ୍ (ବୟସ 20)ଙ୍କୁ ପୋଲିସ୍ ନେପାଳ ସୀମାରୁ ଗିରଫ କରିଛି । ତେବେ ଏହି ତିନି ଜଣ ଗତ 15 ତାରିଖ ରାତିରେ ବଲାଙ୍ଗୀର ସହର ମଧ୍ୟରେ ଥିବା ମୋବାଇଲ ହୋଲସେଲ ଦୋକାନରୁ 40 ଲକ୍ଷ ଟଙ୍କାର ମୋବାଇଲ ଚୋରି କରିଥିଲେ । ତେବେ ପୋଲିସ୍ ଏମାନଙ୍କୁ ଗିରଫ କରିବା ସହ ଏମାନଙ୍କ ଠାରୁ ବିଭିନ୍ନ ନାମୀ ଦାମୀ କମ୍ପାନୀର 113ଟି ମୋବାଇଲ ଉଦ୍ଧାର କରିଛି । ଯାହାର ମୂଲ୍ୟ 30 ଲକ୍ଷ ଟଙ୍କା ହେବ ବୋଲି ପୋଲିସ ସୂଚନା ଦେଇଛି ।
ତେବେ ବଲାଙ୍ଗୀର ପୋଲିସର ସ୍ଵତନ୍ତ୍ର ଟିମରେ ବଲାଙ୍ଗୀର SDPO ତୁଫାନ ବାଗ, ଟାଉନ ଥାନା ଅଧିକାରିଣୀ କେ. ପ୍ରିୟଙ୍କା ରାଉତରାୟ, ଏସଆଇ କେ.କେ ଜାନି, ଏଏସଆଇ ବି. ଦେହୁରୀ ଓ ଏଏସଆଇ ବି. ଭୋଇ ପ୍ରମୁଖ ସାମିଲ ଥିଲେ । ବିହାର ରାଜ୍ୟରୁ ଏମାନଙ୍କୁ ଟ୍ରଞ୍ଜିଟ ରିମାଣ୍ଡରେ ବଲାଙ୍ଗୀର ଆଣି ଅଧିକ ତଦନ୍ତ କରୁଥିବାର ବଲାଙ୍ଗୀର ଏସପି ସୂଚନା ଦେଇଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ଓ୍ବାହିଦ, ଇଟିଭି ଭାରତ
