ବଲାଙ୍ଗୀର: ଲଗାଣ ବର୍ଷାରୁ ବନ୍ୟା । ବଲାଙ୍ଗୀରରେ ଦେଖିବାକୁ ମିଳିଛି ବନ୍ୟା ବିଭୀଷିକା । ଚଳିତ ବର୍ଷ ବଲାଙ୍ଗୀର ଜିଲ୍ଲା ପାଇଁ ଅଶୁଭ ଥିଲା ଅଗଷ୍ଟ 13 । ଏହି ଦିନରୁ ଆରମ୍ଭ ହୋଇଥିଲା ପ୍ରବଳ ବର୍ଷା । ଦୁଇ ଦିନ ମଧ୍ୟରେ ଏହା ରଚାଇଥିଲା ତାଣ୍ଡବ । ସାରା ଜିଲ୍ଲା ପାଣି ଘେରରେ । ଅସ୍ତବ୍ୟସ୍ତ ଜନଜୀବନ । କିନ୍ତୁ ଧିରେ ଧିରେ କମିଲା ବର୍ଷା । ହେଲେ କମିଲାନି ଲୋକଙ୍କ ଦୁର୍ଦ୍ଦଶା । ସାଧାରଣ ଲୋକେ ନିଜର ଅନେକ କିଛି ହରାଇଥିବା ବେଳେ ଏବେ ତାଙ୍କ ସାହାରା ପାଲଟିଛି ଭଙ୍ଗା ଘର। ସେପଟେ ରାଜ୍ୟ ସରକାରଙ୍କ ତରଫରୁ ରିଲିଫ କାର୍ଯ୍ୟର ସମୀକ୍ଷା କରାଯାଇଛି ।
ଲଘୁଚାପ ଜନିତ ବର୍ଷାରେ ଆସିଥିଲା ପ୍ରବଳ ବନ୍ୟା ଏବଂ କିଛି ଘଣ୍ଟା ମଧ୍ୟରେ ସବୁ ଛାରଖାର କରିଥିଲା । ବନ୍ୟା ବିଭୀଷିକା ପରେ ସାଧାରଣ ଜୀବନ ଯାପନ ଖୁବ ପ୍ରଭାବିତ ହୋଇଛି । ଲୋକଙ୍କ ଘର, ଯାନବାହନ, ରାସ୍ତାଘାଟ, ଚାଷବେଉସା ସବୁ ବନ୍ୟା ପାଣିରେ ବୁଡି ଯାଇଥିଲା । ଏବେ ବି ଲୋକେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଥିବା ବେଳେ କ୍ଷତିଗ୍ରସ୍ତ ଲୋକେ ଭଙ୍ଗା ଘରେ ମୁଣ୍ଡ ଗୁଞ୍ଜି ସବୁ ସଜାଡ଼ିବାରେ ଲାଗିଛନ୍ତି । ବର୍ତ୍ତମାନ ଧିରେ ଧିରେ ସ୍ଥିତି ସୁଧୁରି ଆସୁଥିବା ବେଳେ ରାଜ୍ୟ ସରକାରଙ୍କ ତରଫରୁ ରାଜସ୍ବ ଓ ବିପର୍ଯ୍ୟୟ ମନ୍ତ୍ରୀ ବଲାଙ୍ଗୀର ବନ୍ୟାଅଞ୍ଚଳ ବୁଲିବା ସହ ରିଲିଫ କାର୍ଯ୍ୟର ସମୀକ୍ଷା କରିଛନ୍ତି ।
ସେପଟେ କିଛି ବନ୍ୟାଅଞ୍ଚଳରେ ପ୍ରଶାସନ ପହଞ୍ଚି ପାରିନଥିବା ବେଳେ ରିଲିଫ କାର୍ଯ୍ୟ ତ୍ବରାନ୍ବିତ ହୋଇପାରିନାହିଁ । ସମାନ ଭାବରେ ଏହି ସମସ୍ୟା ଯୋଗୁଁ କ୍ଷତିଗ୍ରସ୍ତ ହୋଇଥିବା ଲୋକେ ଅସନ୍ତୋଷ ମଧ୍ୟ ଅଛନ୍ତି । ଏହାସହ ଖୁବଶୀଘ୍ର ତାଙ୍କୁ ସବୁ ସୁବିଧା ଯୋଗାଇ ଦେବାକୁ ଦାବି କରିଛନ୍ତି । ଅନ୍ୟପଟେ ପ୍ରଶାସନ ମଧ୍ୟ ଦୃତ ଗତିରେ ସବୁ ଠିକ କରିବାର ପ୍ରୟାସ ଜାରି ରଖିଛି ।
ରାଜ୍ୟ ସରକାରଙ୍କ ଗସ୍ତକୁ ବଲାଙ୍ଗୀର ବିଧାୟକ ନରସିଂହ ମିଶ୍ର ସ୍ବାଗତ କରିବା ସହ ପରିସ୍ଥିତିକୁ ସୁଧାରିବା ପାଇଁ ପ୍ରୟାସ କରିବା ଦରକାର ବୋଲି କହିଛନ୍ତି । ସେପଟେ ରାଜ୍ୟ ରାଜସ୍ବ ଓ ପ୍ରାକୃତିକ ବିପର୍ଯ୍ୟୟ ମନ୍ତ୍ରୀ ସୁଦାମ ମାରାଣ୍ଡି ଶୁକ୍ରବାର ସମୀକ୍ଷାରେ ଜିଲ୍ଲାର ସବୁ ବିଭାଗ ସହିତ ଆଲୋଚନା କରିଛନ୍ତି । ଆସନ୍ତା 15 ଦିନ ମଧ୍ୟରେ ସବୁ ଠିକ କରିବାକୁ ନିର୍ଦେଶ ଦେଇଛନ୍ତି ।
ଯେଉଁଥିରେ ପିଇବା ପାଣି, ବିଦ୍ୟୁତ ରାସ୍ତା ଯୋଗାଯୋଗକୁ ସେ ଶୀଘ୍ର ଠିକ କରିବା ପାଇଁ ଆଗ୍ରହ ପ୍ରକାଶ କରିଛନ୍ତି । ସମାନ ଭାବରେ 15 ଦିନ ପାଇଁ କୌଣସି ଅଧିକାରୀ ଛୁଟି ନେଇ ପାରିବେ ନାହିଁ ବୋଲି ସେ କହିଛନ୍ତି । ତେବେ ବ୍ୟବସ୍ଥାରେ ସୁଧାର ଆସିଲେ ବନ୍ୟା କ୍ଷୟକ୍ଷତିର ଆକଳନ ହେବ ଓ ଲୋକଙ୍କୁ କ୍ଷତି ପୁରଣ ଦିଆଯିବ ବୋଲି ସେ କହିଛନ୍ତି । ସେପଟେ ଜିଲ୍ଲାରେ ଏହି ବନ୍ୟା ଯୋଗୁଁ ଯୋଗାଯୋଗ, ବିଦ୍ୟୁତ, ଜଳ ଯୋଗାଣ, ଚାଷ, ଘରଦ୍ବାର ସବୁ ବ୍ୟାପକ ନଷ୍ଟ ହୋଇଛି । ତେବେ ଏସବୁ କେବେ ଠିକ ହେଉଛି ତାହା ଦେଖିବାକୁ ବାକି ରହିଲା।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
