ବଲାଙ୍ଗୀର: ଲୋକଙ୍କ ଜୀବନ ତମାମର ଜମା ପୁଞ୍ଜି ହଡ଼ପ ଅଭିଯୋଗରେ ଗିରଫ ହେଲେ 420 ପୋଷ୍ଟ ମାଷ୍ଟର। ତେବେ ଅଭିଯୋଗ ଅନୁସାରେ ବଲାଙ୍ଗୀର ଲୋଇସିଂହା ଥାନା ଅନ୍ତର୍ଗତ ବାଡ଼ିବାହଲ ଗ୍ରାମରେ ଥିବା ଡାକ ଘରେ ଲୋକ ବିଶ୍ବାସ କରି ତାଙ୍କର ଜୀବନ ତମାମର ଟଙ୍କା ଜମା କରିଥିଲେ ଯାହାକୁ ଏହି ପୋଷ୍ଟ ମାଷ୍ଟର ହଡ଼ପ କରିଛନ୍ତି ।
ଲୋକଙ୍କ ଟଙ୍କା ହଡ଼ପ କରି ପୋଷ୍ଟ ମାଷ୍ଟର ଗିରଫ
ଏଠି ବିଭିନ୍ନ ଯୋଜନାରେ ଲୋକେ ଟଙ୍କା ଜମା ରଖିଥିବା ବେଳେ ତାଙ୍କ ଅଜାଣତରେ ଏହି ଟଙ୍କା ଉଠାଣ ହୋଇଥିବାର ସେମାନେ ଜାଣିବାକୁ ପାଇଥିଲେ। ସବୁ ଜମା ଟଙ୍କା ହଡ଼ପ ହୋଇଥିବାର ଜାଣି ଲୋକ ମାନେ ବଲାଙ୍ଗୀର ମୁଖ୍ୟ ଡାକ ପ୍ରବନ୍ଧକ ଓ ଲୋଇସିଂହା ପୋଲିସରେ ଲିଖିତ ଅଭିଯୋଗ କରିଥିଲେ।
ଯାହା ପରେ ଲୋଇସିଂହା ପୋଲିସ୍ ତଦନ୍ତ କରି ଏହି ଡାକ ଘରର ପୋଷ୍ଟ ମାଷ୍ଟର ମାଧବ ଚନ୍ଦ୍ର ବାରିକଙ୍କୁ ମଙ୍ଗଳବାର ଗିରଫ କରିବା ସହ କୋର୍ଟ ଚାଲାଣ କରିଛି। ସେପଟେ ଅଭିଯୁକ୍ତ ଜେଲ ଯାଇଥିବା ବେଳେ ଲୋକେ ତାଙ୍କର ଜମା ଟଙ୍କା କେମିତି ଫେରି ପାଇବେ ତାକୁ ନେଇ ଚିନ୍ତାରେ ରହିଛନ୍ତି।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
