ବଲାଙ୍ଗୀର: ବଜ୍ରାଘାତରେ ତିନି ଜଣ ମହିଳାଙ୍କ ମୃତ୍ୟୁ । ବଲାଙ୍ଗୀରରେ ମଙ୍ଗଳବାର ଚାଷ ଜମିରେ କାମକରୁଥିବାବେଳେ ବଜ୍ରାଘାତ ଯୋଗୁଁ ତିନି ଜଣ ମହିଳାଙ୍କୁ ମୃତ୍ୟୁ ହୋଇଛି ।
ଚାଷ ଜମିରେ କାମକରୁଥିବାବେଳେ ବଜ୍ରାଘାତ, 3 ମହିଳା ମୃତ
ସୂଚନା ଅନୁଯାୟୀ ବଲାଙ୍ଗୀର ସଦର ଥାନା ଅନ୍ତର୍ଗତ ଚୁଡାପାଳି ବଡ ତେଲେନପାଳି ଗ୍ରାମରେ କ୍ଷେତରେ ମହିଳା ମାନେ କାମ କରୁଥିବା ସମୟରେ ବର୍ଷା ହେବା ସାଙ୍ଗକୁ ବଜ୍ରାଘାତ ହୋଇଥିଲା । ବଜ୍ରାଘାତ ଯୋଗୁଁ କ୍ଷେତରେ କାମ କରୁଥିବା ତିନି ଜଣ ମହିଳା ଶ୍ରମିକଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିଲା । ଘଟଣା ପରେ ଗ୍ରାମବାସୀମାନେ ସମସ୍ତଙ୍କୁ ଉଦ୍ଧାର କରି ବଲାଙ୍ଗୀର ମେଡ଼ିକାଲ କଲେଜରେ ଭର୍ତ୍ତି କରିଥିଲେ । ସେଠାରେ ଡାକ୍ତର ସମସ୍ତଙ୍କୁ ମୃତ ଘୋଷଣା କରିଥିଲେ ।
ତେବେ ମୃତକ ମହିଳା ମାନେ ବିଳାସିନୀ ରାଉତ, ଯଶୋବନ୍ତ ଶବର ଓ ପ୍ରେମାଦିନି ଧାରୁଆ ବୋଲି ଜଣାପଡ଼ିଛି । ବଲାଙ୍ଗୀର ସଦର ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ମୃତଦେହ ବ୍ୟବଚ୍ଛେଦ ପାଇଁ ପଠାଇଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ,ଇଟିଭି ଭାରତ
