ବଲାଙ୍ଗୀର: ଜିଲ୍ଲାରେ ବନ୍ଦ ଡ଼ାକରା ଦ୍ଵିତୀୟ ଦିନରେ ପହଞ୍ଚିଛି । ସମସ୍ତ ସରକାରୀ କାର୍ଯ୍ୟାଳୟ ଅଚଳ ରହିଛି । ରାଜ୍ୟ ଓ କେନ୍ଦ୍ର ସରକାରଙ୍କ ସବୁ ଅନୁଷ୍ଠାନ ବନ୍ଦ ରହିଛି । ସେପଟେ ଏହି ଦାବି ପୂରଣ ନ ହେଲେ ଆଗକୁ ଏହି ଆନ୍ଦୋଳନ ଆହୁରି ତୀବ୍ର କରିବେ ବୋଲି ଆନ୍ଦୋଳନକାରୀ କହିଛନ୍ତି ।
ବଲାଙ୍ଗୀରରେ ଦୀର୍ଘଦିନରୁ ଦାବି ହୋଇଆସୁଥିବା ହାଇକୋର୍ଟର ସ୍ଥାୟୀ ବେଞ୍ଚ ସ୍ଥାପନ, ଲୋୟର ସୁକତେଲ ପ୍ରକଳ୍ପ ସମ୍ପୂର୍ଣ୍ଣ କରିବା ଓ ବାଇପାସ ଦାବି ନେଇ ଚାଲିଥିବା ଦୁଇ ଦିନିଆ ବଲାଙ୍ଗୀର ବନ୍ଦର ପ୍ରଭାବ ଜିଲ୍ଲାର ସବୁ ଆଡେ ଦେଖିବାକୁ ମିଳିଛି । ଆନ୍ଦୋଳନର ନେତୃତ୍ବ ନେଉଥିବା କ୍ରିୟାନୁଷ୍ଠାନ କମିଟି ଓ ତାକୁ ସମର୍ଥନ କରୁଥିବା ଶତାଧିକ ସଂଗଠନ ସହରରେ ପିକେଟିଂ କରି ସବୁ ସରକାରୀ କାର୍ଯ୍ୟାଳୟ ବନ୍ଦ କରିଛନ୍ତି । ସହରର ବ୍ୟାଙ୍କ, ବୀମା କାର୍ଯ୍ୟାଳୟ, କୋର୍ଟ କଚେରୀ ସମେତ ସବୁ କେନ୍ଦ୍ର ଓ ରାଜ୍ୟ ସରକାରଙ୍କ କାର୍ଯ୍ୟାଳୟ ବନ୍ଦ ରହିଛି ।
ତେବେ ଦୁଇଦିନିଆ ବନ୍ଦ ସଫଳ ହୋଇଥିବାବେଳେ ବନ୍ଦ ଶାନ୍ତିପୂର୍ଣ୍ଣ ରହିଛି । ସେପଟେ ଆଗକୁ ମଧ୍ୟ ଏହି ଆନ୍ଦୋଳନ ଜାରି ରହିବା ସହ ସବୁ ମାସର ତୃତୀୟ ବୁଧବାର ଓ ଗୁରୁବାର ଦୁଇଦିନ ସରକାରୀ କାର୍ଯ୍ୟାଳୟ ବନ୍ଦ କରାଯିବ ବୋଲି ଆନ୍ଦୋଳନକାରୀ କହିଛନ୍ତି । ସରକାର ଅଣଦେଖା କଲେ ଆଗକୁ ଏହି ଆନ୍ଦୋଳନ ଆହୁରି ତୀବ୍ର ହେବ ବୋଲି ଆନ୍ଦୋଳନକାରୀ ଚେତାବନୀ ଦେଇଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ,ଇଟିଭି ଭାରତ
