ବଲାଙ୍ଗୀର: ପଞ୍ଚାୟତ ନିର୍ବାଚନରେ ଅନେକ ବଡ଼ ବଡିଆ ନେତା ଏବେ ଗାଁ ମୁହାଁ ହୋଇଛନ୍ତି । ତେବେ ବଲାଙ୍ଗୀରରେ ଜଣେ ବଡ଼ ନେତା ଏଥିରେ ଆହୁରି ପାଦେ ଆଗକୁ ଯାଇ ନିଜେ ସମିତି ଭାବରେ ପ୍ରତିଦ୍ବନ୍ଦିତା କରୁଛନ୍ତି । ଏହି ବଡ଼ ନେତା ଦିନେ କଂଗ୍ରେସ ଦଳର ବଲାଙ୍ଗୀର ବିଧାୟକ ପ୍ରାର୍ଥୀ ଭାବରେ ଲଢେଇ କରିଥିଲେ । ତେବେ ବଲାଙ୍ଗୀରର ଜଣାଶୁଣା ନେତା ଲକ୍ଷ୍ମଣ ମେହେର ଗତ 2009 ବିଧାନସଭା ନିର୍ବାଚନରେ ବଲାଙ୍ଗୀର ବିଧାୟକ ପଦବୀ ପାଇଁ କଂଗ୍ରେସ ଦଳରୁ ପ୍ରତିଦ୍ବନ୍ଦିତା କରିଥିଲେ ।
ତାଙ୍କ ବିପକ୍ଷରେ ବଲାଙ୍ଗୀର ରାଜା ପରିବାରରୁ ଅନଙ୍ଗ ଉଦୟ ସିଂହ ଦେଓ ପ୍ରତିଦ୍ବନ୍ଦିତା କରିଥିଲେ । ତେବେ ଏହି ନିର୍ବାଚନରେ ଲକ୍ଷ୍ମଣ ମେହେର 36 ହଜାର 82 ଭୋଟ ପାଇଥିବା ବେଳେ ଦ୍ଵିତୀୟ ସ୍ଥାନରେ ରହି ବିଜେଡି ଠାରୁ ପରାଜିତ ହୋଇଥିଲେ । ଯାହା ପରେ ସେ ବଲାଙ୍ଗୀର ଜିଲ୍ଲା କେନ୍ଦ୍ରୀୟ ସମବାୟ ବ୍ୟାଙ୍କର ଅଧ୍ୟକ୍ଷ ଭାବରେ ନିର୍ବାଚିତ ମଧ୍ୟ ହୋଇଥିଲେ ।
ତେବେ ଏହି ନେତା ଏବେ ବିଜେଡି ଦଳର ମଙ୍ଗ ଧରିଥିବା ବେଳେ ନିଜେ ଏଥର ପଞ୍ଚାୟତ ରାଜନୀତିକୁ ଓହ୍ଲାଇଛନ୍ତି । ଦେଓଗାଁ ବ୍ଲକ ସାଲେପାଲି ପଞ୍ଚାୟତରୁ ସେ ସମିତି ସଭ୍ୟ ଭାବରେ ପ୍ରତିଦ୍ବନ୍ଦିତା କରୁଛନ୍ତି । ତେବେ ଆଗକୁ ଦେଓଗାଁ ବ୍ଲକ ଅକ୍ତିଆର ଏହାର ମୂଳ ଲକ୍ଷ୍ୟ ଥିବା ବେଳେ ସେ ଏଥିରେ ନିହାତି ଭାବରେ ସଫଳ ହେବେ ବୋଲି କହିଛନ୍ତି । ସେହିପରି ଲୋକଙ୍କ ସେବା ତାଙ୍କ ପାଇଁ ଗୁରୁତ୍ବ ରଖିଥିବା ବେଳେ ନିର୍ବାଚନ ଏହାପାଇଁ ଏକ ପ୍ରକ୍ରିୟା ବୋଲି ସେ କହିଛନ୍ତି ଏବଂ ତାହା କୌଣସି ସ୍ତରରେ ହେଲେ ମଧ୍ୟ ଲୋକଙ୍କ ସେବା ପାଇଁ ତାହା କରିବାକୁ ପଡ଼ିଥାଏ ବୋଲି ସେ କହିଛନ୍ତି । ତେବେ ସେ ଦେଓଗାଁ ବ୍ଲକର ସର୍ବାଙ୍ଗୀନ ଉନ୍ନତି ଓ ଆଦର୍ଶ ବ୍ଲକ ଗଢି ତୋଳିବେ ବୋଲି କହିଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ଓ୍ବାହିଦ, ଇଟିଭି ଭାରତ
