ଅନୁଗୋଳ: ଜିଲ୍ଲାର ବଳରାମ ପ୍ରସାଦଠାରେ ESI ହସ୍ପିଟାଲର ଲୋକାର୍ପଣ କରିଛନ୍ତି, କେନ୍ଦ୍ର ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଅନ୍ୟମାନଙ୍କ ମଧ୍ୟରେ କେନ୍ଦ୍ର ଶ୍ରମ ରାଷ୍ଟ୍ର ମନ୍ତ୍ରୀ ରାମେଶ୍ଵର ତେଲି, ଓଡିଶା ଶ୍ରମ ରାଷ୍ଟ୍ର ମନ୍ତ୍ରୀ ଶ୍ରୀକାନ୍ତ ସାହୁ, ଢେଙ୍କାନାଳ ଏମପି ମହେଶ ସାହୁଙ୍କ ସମେତ କେନ୍ଦ୍ର ଓ ରାଜ୍ୟ ଶ୍ରମ ବିଭାଗର ବହୁ ବରିଷ୍ଠ ଅଧିକାରୀ ଯୋଗଦେଇଥିଲେ ।
ପ୍ରାୟ ୫ ଏକର ଜମିରେ ୬୫ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିବା ଏହି ହସ୍ପିଟାଲ ଯୋଗୁଁ ହଜାର ହଜାର ଶ୍ରମିକ ଉପକାର ପାଇ ପାରିବେ । ତେଣୁ କେନ୍ଦ୍ର ସରକାରଙ୍କ ଏହା ଏକ ବଡ଼ ଉପହାର ବୋଲି ଉଭୟ କେନ୍ଦ୍ର ମନ୍ତ୍ରୀ କହିଥିଲେ । ଏହି ଅବସରରେ ଭର୍ଚୁଆଲରେ ଝାରସୁଗୁଡା ଠାରେ ଇଏସଆଇର ଏକ ଉପଆଞ୍ଚଳିକ କାର୍ଯ୍ୟାଳୟକୁ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉଦଘାଟନ କରିଥିଲେ ।
ଏହାଦ୍ୱାରା ପଶ୍ଚିମ ଓଡିଶାର ୧୩ଟି ଜିଲ୍ଲାର ହଜାର ହଜାର ଶ୍ରମିକ ସିଧା ସଳଖ ଲାଭ ପାଇ ପାରିବେ ବୋଲି ମନ୍ତ୍ରୀ କହିଥିଲେ । ଏହି ଅବସରରେ କିଛି ଶ୍ରମିକ କୋଭିଡରେ ପ୍ରାଣ ହରାଇଥିଲେ ଏବଂ ଆଉ କିଛି ଶ୍ରମିକ କାମ କରୁଥିବା ବେଳେ ନିଜର ଅଙ୍ଗ ହରାଇଛନ୍ତି । ସେମାନଙ୍କୁ ଶ୍ରମିକ ଓ ଶ୍ରମିକ ପରିବାରକୁ ଆର୍ଥିକ ସହାୟତା ପ୍ରଦାନ କରାଯାଇଥିଲା ।
ଇଟିଭି ଭାରତ, ଅନୁଗୋଳ
