ଅନୁଗୋଳ:ଜୋରରେ ଭାସି ଯାଇ ବୃଦ୍ଧ ନିଖୋଜ । ଅନୁଗୋଳ ଜିଲ୍ଲା ତାଳଚେର ବ୍ଲକ ଗୁରୁ ଜାଙ୍ଗୁଲି ପଞ୍ଚାୟତ ଖୋଲୁଆ ଗାଁର ଜଣେ ବୃଦ୍ଧ ନନ୍ଦିରା ଜୋରରେ ଭାସି ଯାଇ ନିଖୋଜ ଥିବା ତାଙ୍କ ପରିବାର ପକ୍ଷରୁ ଅଭିଯୋଗ ହୋଇଛି।
ତାଳଚେର ବ୍ଲକ ଗୁରୁଜାଙ୍ଗୁଲି ଗ୍ରାମପଞ୍ଚାୟତ ଖୋଲୁଆ ଗ୍ରାମର ୭୦ ବର୍ଷୀୟ ବୃଦ୍ଧ ମହରଗା ସାହୁ ଶୁକ୍ରବାର ସକାଳୁ ନନ୍ଦିରା ଜୋରରେ ଭାସି ଯାଇଥିଲେ। ପରିବାର ପକ୍ଷରୁ ମିଳିଥିବା ସୂଚନା ଅନୁସାରେ ମହରଗା ସାହୁ କୌଣସି କାରଣବଶତଃ ନନ୍ଦିରା ଜୋରକୁ ଆସିଥିଲେ । କିନ୍ତୁ ପାଦ ଖସି ଯିବାରୁ ପାଣିର ପ୍ରଖର ସ୍ରୋତରେ ଭାସି ଯାଇଥିବା ନେଇ ସେମାନେ ସନ୍ଦେହ କରୁଛନ୍ତି।
ଗ୍ରାମବାସୀମାନେ ଖୋଜାଖୋଜି କରିଥିଲେ ସୁଦ୍ଧା ତାଙ୍କୁ ଠାବ କରିବାରେ ବିଫଳ ହୋଇଛନ୍ତି l ନନ୍ଦିରା ଜୋରରେ ହଠାତ ପ୍ରବଳ ବର୍ଷା ପାଣି ମାଡି ଆସିଥିବା ଯୋଗୁଁ ଏପରି ଦୁଃଖଦ ଘଟଣା ଘଟିଛି l ସେପଟେ ପରିବାର ପକ୍ଷରୁ ବୃଦ୍ଧଙ୍କ ନିଖୋଜ ହେବାର ଖବର ତାଳଚେର ସଦର ପୋଲିସଙ୍କୁ ଜଣାଯାଇଛି । ଏପର୍ଯ୍ୟନ୍ତ ଉଦ୍ଧାର ପାଇଁ ପୋଲିସ କିମ୍ବା ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନଥିବା ଜଣାପଡିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
