ଅନୁଗୋଳ: ଭାରତ ତଥା ବିଶ୍ବର ପ୍ରଥମ ହସ୍ପିଟାଲ ଇନ ଟ୍ରେନ ଏବେ ଅନୁଗୋଳରେ ପହଞ୍ଚିଛି । ଆସନ୍ତାକାଲି(ସୋମବାର) ଠାରୁ ୩୦ ତାରିଖ ଯାଏଁ ଏହି ହସ୍ପିଟାଲ ଟ୍ରେନ ଅନୁଗୋଳ ଷ୍ଟେସନରେ ରହିବ । ଏହି ଟ୍ରେନର ନାମ ଜୀବନରେଖା ଏକ୍ସପ୍ରେସ । ଟ୍ରେନ ଭିତରେ ଅତ୍ୟାଧୁନିକ ଚିକିତ୍ସା ଉପକରଣ ସହ ବିଭିନ୍ନ ପ୍ରକାର ସ୍ବାସ୍ଥାସେବାର ବ୍ୟବସ୍ଥା ରହିଛି । ତେଣୁ ଏହାକୁ ହସ୍ପିଟାଲ ଇନ ଟ୍ରେନ କୁହାଯାଉଛି । ଟ୍ରେନଟି ବର୍ତ୍ତମାନ ଅନୁଗୋଳରେ ପହଞ୍ଚିଥିବାବେଳେ ଦେଶର କୋଣ ଅନୁକୋଣରୁ ଅଭିଜ୍ଞ ଡାକ୍ତରମାନେ ଆସି ଏଠାରେ ରୋଗୀଙ୍କୁ ଚିକିତ୍ସା କରିବେ । ସମ୍ପୂର୍ଣ୍ଣ ମାଗଣାରେ ଚିକିତ୍ସା କରାଯିବା ସହ ଆବଶ୍ୟକ ଉପକରଣ ଏବଂ ଔଷଧ ଯୋଗାଇ ଦିଆଯିବାର ବ୍ୟବସ୍ଥା ମଧ୍ୟ ରହିଛି । ତେଣୁ ଜିଲ୍ଲାବାସୀ ଏହି ହସ୍ପିଟାଲ ଇନ ଟ୍ରେନର ସୁବିଧା ନେବାକୁ ଅନୁରୋଧ କରିଛନ୍ତି ଏହାର ପରିଚାଳନା ସଂସ୍ଥା 'ଇମ୍ପାକ୍ଟ ଇଣ୍ଡିଆ ଫାଉଣ୍ଡେସନ'।
ଜୀବନ ରେଖା ଏକ୍ସପ୍ରେସ ହେଉଛି ଭାରତ ବର୍ଷର ପ୍ରଥମ ହସ୍ପିଟାଲ ଇନ ଟ୍ରେନ । ଯେଉଁଥିରେ ଅସ୍ତ୍ରୋପଚାର ପାଇଁ ରହିଛି ସ୍ବତନ୍ତ୍ର ବଗି । ରୋଗୀଙ୍କୁ ଚିକିତ୍ସା ସୁବିଧା ଯୋଗାଇବା ପାଇଁ ଅଭିଜ୍ଞ ଡାକ୍ତର ଅଛନ୍ତି । ଆଖି ହେଉ କି କାନ କିମ୍ବା ଦାନ୍ତ ସବୁର ସଫଳ ଚିକିତ୍ସା ଓ ଅସ୍ତ୍ରୋପଚାର ପାଇଁ ସୁବନ୍ଦୋବସ୍ତ କରାଯାଇଛି । ଖାଲି ସେତିକି ନୁହେଁ, ଫଟା ଓଠରେ ଅସ୍ତ୍ରୋପଚାର ସହିତ ଅସ୍ଥି ଜନିତ ଯେକୌଣସି ଅସ୍ତ୍ରୋପଚାର ଏହି ଟ୍ରେନରେ କରାଯିବାର ବ୍ୟବସ୍ଥା ରହିଛି । ଭାରତ ବର୍ଷର ବହୁ ଅଭିଜ୍ଞ ଡାକ୍ତର ଏଠାରେ ଆସି ରୋଗୀଙ୍କୁ ମାଗଣାରେ ସ୍ବାସ୍ଥ୍ୟ ସେବା ଯୋଗାଇବେ । ଆବଶ୍ୟକ ପଡ଼ିଲେ ଯେଉଁମାନଙ୍କର ଅସ୍ତ୍ରୋପଚାର ଦରକାର ତାହା ମଧ୍ୟ କରାଯିବ । ଇମ୍ପାକ୍ଟ ଇଣ୍ଡିଆ ଫାଉଣ୍ଡେସନ ଦ୍ବାରା ପରିଚାଳିତ ଏହି ଲାଇଫଲାଇନ ବା ଜୀବନରେଖା ଏକ୍ସପ୍ରେସ ଟ୍ରେନ ଲୋକଙ୍କୁ ମାଗଣା ସ୍ବାସ୍ଥ୍ୟସେବା ପ୍ରଦାନ କରିବ ।
ଏହି ଲାଇଫଲାଇନ ଟ୍ରେନରେ ୭ଟି ବଗି ରହିଛି । ସେଥିମଧ୍ୟରୁ ତିନୋଟି ବଗିରେ ଓଟି ବା ଅପରେସନ ଥିଏଟର ଅଛି । ଏହାବ୍ୟତୀତ ରୋଗ ପରୀକ୍ଷା ପାଇଁ ସ୍ବତନ୍ତ୍ର ଲାବ୍ରୋଟୋରୀ ସହ ଆବଶ୍ୟକୀୟ ପରୀକ୍ଷା ସରଞ୍ଜାମର ବ୍ୟବସ୍ଥା ରହିଛି । ବଡ କଥା ହେଉଛି, ଦିଲ୍ଲୀ ସମେତ ମୁମ୍ବାଇ, ବାଙ୍ଗାଲୋର ଓ ଅନ୍ୟାନ୍ୟ ସ୍ଥାନରୁ ଅଭିଜ୍ଞ ଡାକ୍ତରମାନେ ଏଠାରେ ଲୋକଙ୍କ ଚିକିତ୍ସା କରିବେ । ଏହି ଟ୍ରେନ ଆସନ୍ତା 30 ତାରିଖ ପର୍ଯ୍ୟନ୍ତ ଅନୁଗୋଳ ଷ୍ଟେସନରେ ରହିବ । 15 ତାରିଖରୁ ଏଠାରେ ଚିକିତ୍ସା ସୁବିଧା ପାଇପାରିବେ ଲୋକେ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
