ଅନୁଗୋଳ: ଜିଲ୍ଲାର ସଭାଗାର ଠାରେ 'ପ୍ରଜାପିତା ବ୍ରହ୍ମା କୁମାରୀ ଇଶ୍ୱରୀୟ ବିଶ୍ୱବିଦ୍ୟାଳୟ'ର ସୁବର୍ଣ୍ଣ ଜୟନ୍ତୀ ଅନୁଷ୍ଠିତ ହୋଇଯାଇଛି । ଏହି ଅବସରରେ ମାତୃଭାଷାରେ ପିଲାମାନେ ପାଠ ପଢିଲେ ପାଠ ବୁଝିବାରେ ସହଜ ହେବ ଓ ପାଠକୁ ଭଲ ଭାବରେ ବୁଝିଲେ ହିଁ ପିଲା ମାନଙ୍କ ମଧ୍ୟରେ ଥିବା ଜ୍ଞାନର ଅଭ୍ୟୁଦୟ ଘଟିବ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
ସୂଚନା ଅନୁଯାୟୀ, 'ପ୍ରଜାପିତା ବ୍ରହ୍ମା କୁମାରୀ ଇଶ୍ୱରୀୟ ବିଶ୍ୱବିଦ୍ୟାଳୟ ଆଧ୍ୟାତ୍ମିକ ଶିକ୍ଷାଦାନର ଅନ୍ୟତମ ଅନୁଷ୍ଠାନ । ଯାହା ରାଜ୍ୟରେ ଦୀର୍ଘ ୫୦ ବର୍ଷର ଯାତ୍ରା ପୂରଣ କରିବା ଅବସରରେ ଧର୍ମେନ୍ଦ୍ର ପ୍ରଧାନ ଯୋଗ ଦେବା ସହ ସମସ୍ତଙ୍କୁ ଅଭିନନ୍ଦନ ଜଣାଇଛନ୍ତି । ତେବେ ନିକଟରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ କରକମଳରେ ଓଡ଼ିଆ ଭାଷାରେ ଇଞ୍ଜିନିୟରିଂ ପୁସ୍ତକର ଉନ୍ମୋଚନ ହୋଇଛି । ମାତ୍ର ଇଞ୍ଜିନିୟରିଂ ପାଠ୍ୟକ୍ରମ ଓଡ଼ିଆରେ ପଢିଲେ ଚାକିରି ମିଳିବ କି ନାହିଁ ତାହାକୁ ନେଇ ବିତର୍କ ହେଉଛି ।
ଏନେଇ ସେ କହିଛନ୍ତି ଯେ ପାଠକୁ ନମ୍ବର ଆଧାରିତ କିମ୍ବା ମୁଖସ୍ତ କରିବା ନୁହେଁ ବରଂ ମାତୃଭାଷା ମାଧ୍ୟମରେ ପାଠକୁ ବୁଝାଇବାର ଦାୟିତ୍ୱ ରହିଛି । ପାଠ ବୁଝିଲେ ହିଁ ପିଲାଙ୍କ ମଧ୍ୟରେ ଜ୍ଞାନର ଅଭ୍ୟୁଦୟ ଘଟିବ । ମାତୃଭାଷାରେ ପାଠ ପଢିଲେ ପାଠ ବୁଝିବାରେ ସହଜ ହେବ । ଏଥିପାଇଁ ଜାତୀୟ ଶିକ୍ଷା ନୀତିରେ ମାତୃଭାଷାକୁ ଗୁରୁତ୍ୱ ଦିଆଯାଇଛି । ସମାଜ ଭିତରେ ମୂଲ୍ୟବୋଧ, ଭାଇଚାରା, ଶିକ୍ଷାର ମୂଳ ତତ୍ତ୍ୱକୁ ବ୍ୟାପକ କରିବାରେ ବ୍ରହ୍ମା କୁମାରୀ ଇଶ୍ୱରୀୟ ବିଶ୍ୱବିଦ୍ୟାଳୟର କାମ ପ୍ରଶଂସନୀୟ ।
ମୂଳରୁ ଏହି ଅନୁଷ୍ଠାନ ଦେଉଥିବା ଶିକ୍ଷାକୁ ଜାତୀୟ ଶିକ୍ଷା ନୀତିରେ ରୂପାନ୍ତରିତ କରାଯାଇଛି । ସମାଜର ବସ୍ତୁବାଦୀ ସଭ୍ୟତାରେ ମଣିଷକୁ ଜୀବନର ମୂଳ ଉଦ୍ଦେଶ୍ୟ ବୁଝାଇବାରେ ଏହି ଅନୁଷ୍ଠାନ ନିରନ୍ତର କାର୍ଯ୍ୟ କରି ଚାଲିଛି । ଏହି ମର୍ମରେ ସମସ୍ତେ ସାମୂହିକ ଭାବରେ ଦେଶକୁ ମଜବୁତ କରିବା ବୋଲି କହିବା ସହ କେନ୍ଦ୍ର ଆଗାମୀ ଦିନରେ ସଂସ୍ଥାର ଉତ୍ତରୋତ୍ତର ଉନ୍ନତି କାମନା କରିଛନ୍ତି । ଏହା ଛଡା ଏହି ଅବସର ରେ ସଂସ୍ଥାର ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଇଟିଭି ଭାରତ, ଅନୁଗୋଳ
