ଅନୁଗୋଳ: ବଞ୍ଚିଛି ବୃତ୍ତି । ରହିଛି ପରମ୍ପରା । ହେଲେ ମିଳୁନି ପ୍ରୋତ୍ସାହନ । ଘରକୁ ଘର କରି ଗଢି ତୋଳିବାରେ ଏକ ବଡ ଅବଦାନ ରଖୁଥିବା ଏହି କୁଶଳୀ କାରଗର ଏବେ ସମସ୍ୟା ପାହାଡ ତଳେ । ପରିଶ୍ରମ ତୁଳନାରେ ମିଳୁନି ପାରିଶ୍ରମିକ । ଆଧୁନିକତାର ଚାଦର ତଳେ ଲୁଚିଯାଇଛି ପାରମ୍ପରିକ ଉପକରଣ । ବିପଦରେ ଭବିଷ୍ୟତ । ଅଭାବ ଅନଟନ ମଧ୍ୟରେ ଅନୁଗୋଳର ବଅଁରପାଳ ବ୍ଲକର ବେଣାଗାଡିଆ ପଞ୍ଚାୟତର ଶିତିରା ସାହିରେ ବସବାସ କରୁଥିବା ୪୦ ପରିବାର।
ଯୁଗ ଯେତେ ଆଗକୁ ଗଲେବି ନିତ୍ୟ ବ୍ୟବହାର୍ଯ୍ୟ ପାଇଁ ଦରକାର ଘରକରଣା ଉପକରଣ । ନଡିଆ କୋରଣି ହେଉ କି କଖାରୁ କୋରଣା, ଖଡିକା ହେଉ କି ଚଟୁ ଏଭଳି ବିଭିନ୍ନ ସାମଗ୍ରୀ ବିନା ଅଧା ହାଣ୍ଡିଶାଳ । ହେଲେ ଏବେ ଦିନକୁ ଦିନ ବଜାରରେ ଏହାର ଚାହିଦା ହ୍ରାସ ପାଇବାକୁ ଲାଗିଛି । ନୂଆ ନୂଆ ଟେକନୋଲୋଜି ଯୋଗୁଁ ପୁରୁଣାକାଳିଆ ଘରକରଣା ଜିନିଷ ପ୍ରତି ମୁହଁ ଫେରାଉଛନ୍ତି ଲୋକେ । ଆଉ ବାକି ଯିଏ ଏହାକୁ କିଣନ୍ତି , ସେମାନେ ଉଚିତ ମୁଲ୍ୟ ଦେବାକୁ ଅମଙ୍ଗ । ଏଥିଯୋଗୁଁ ଏବେ ବିପଦ ଘେରରେ 400ରୁ ଉର୍ଦ୍ଧ୍ବ ଜୀବନ ।
ନିଜର କୌଳିକ ବୃତିକୁ ଜୀବିତ ରଖିବାକୁ ସଂଘର୍ଷ କରୁଛନ୍ତି ଏହି ଶିତିରା ସମ୍ପ୍ରଦାୟ । ହାତ ତିଆରି କରୁଥିବା ଘର କରଣା ଜିନିଷକୁ ବିଭିନ୍ନ ହାଟ , ବଜାର ଓ ମେଳାରେ ଏମାନେ ବିକ୍ରି କରନ୍ତି । ଅଦରକାରୀ ସାମଗ୍ରୀ ବିକ୍ରି କରୁଥିବା କବାଡି ଦୋକାନରୁ ଭଙ୍ଗା ଲୁହାକୁ ଓ ଟିଣ ପାତିଆ ସଂଗ୍ରହ କରି ନିଜ କୌଶଳରେ ଅନେକ ଆବଶ୍ୟକୀୟ ଜିନିଷ ତିଆରି କରୁଛନ୍ତି । ଯଦି ଏମାନଙ୍କୁ ଆଗକୁ କିଛି ସରକାରୀ ସହାୟତା ମିଳେ ତେବେ ଆଗକୁ ଏହି କୂଳ ବେଉସା ବଡ ବେପାର ଭାବେ ମୁଣ୍ଡ ଟେକିବ ବୋଲି କୁହାଯାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
