ଅନୁଗୋଳ: ସ୍ବୟଂ ସହାୟକ ଗୋଷ୍ଠୀର ଟଙ୍କା ହଡପ । ଓଡିଶା ଜୀବିକା ମିଶନରେ କାର୍ଯ୍ୟରତ ସିଆରପି(କମ୍ୟୁନିଟି ରିସୋର୍ସ ପର୍ସନ) ଲୁଟିଛନ୍ତି ଟଙ୍କା । ଏପରି ଦେଖିବାକୁ ମିଳିଛି ଅନୁଗୋଳ ବ୍ଳକର ଟାଇଁଶି ପଞ୍ଚାୟତର ଭଗତପୁର ଗାଁରେ । ଗାଁର 11ଟି ସ୍ବୟଂ ସହାୟକ ଗୋଷ୍ଠୀର ଲକ୍ଷ ଲକ୍ଷ ଟଙ୍କା ଚଳୁକରି ଫେରାର ହୋଇଯାଇଛନ୍ତି ସିଆରପି ।
ସୂଚନା ଥାଉକି, ଗ୍ରାମାଞ୍ଚଳରେ ମହିଳାମାନଙ୍କ ଆର୍ଥିକ ଓ ସାମାଜିକ ବିକାଶ ପାଇଁ ଓଡିଶା ଜୀବିକା ମିଶନ ଜରିଆରେ ସହାୟତା ଦେଉଛନ୍ତି ରାଜ୍ୟ ସରକାର । ଯାହା ଜରିଆରେ ମହିଳା ମାନଙ୍କୁ ଦକ୍ଷତା ବିକାଶ ତାଲିମ ଓ ଖୁବ କମ୍ ସୁଧ ହାରରେ ଋଣ ଯୋଗାଇ ଦିଆଯାଉଛି । ଯେଉଁଥିରେ ଗତ 2013-14 ଆର୍ଥିକ ବର୍ଷରେ ଭଗତପୁର ଗାଁର ପ୍ରାୟ 11ଟି ମହିଳା ସ୍ବୟଂ ସହାୟକ ଗୋଷ୍ଠୀକୁ ଜୀବିକା ମିଶନ 50 ହଜାର ଟଙ୍କା ଲେଖାଏଁ ଋଣ ଯୋଗାଇ ଦେଇଥିଲା ।
ସେହି ଋଣ ଟଙ୍କାରେ ମହିଳା ମାନେ ଛେଳି ଚାଷ, ସିଲେଇ, କୁକୁଡା ଚାଷ ଆଦି କରି କିସ୍ତି ଆକାରରେ ଋଣ ପରିଶୋଧ କଲେ । ମିଶନର ନିୟମ ଅନୁସାରେ ପ୍ରଥମ ଋଣ ପରିଶୋଧ କରିବା ପରେ ଦ୍ବିତୀୟ ପର୍ଯ୍ୟାୟରେ 90ହଜାର ଟଙ୍କା ଲେଖାଏଁ ଋଣ ପ୍ରଦାନ କରାଯିବା କଥା । କିନ୍ତୁ ବର୍ଷ ବର୍ଷ ଧରି ମହିଳା ଗୋଷ୍ଠୀ ଦ୍ବିତୀୟ ପର୍ଯ୍ୟାୟ ଋଣ ପାଇପାରିଲେ ନାହିଁ ।
ଏହାର କାରଣ ଖୋଜିବା ପରେ ଜଣାପଡିଥିଲା ଯେ, ପ୍ରତ୍ୟେକ ମାସରେ ବୈଠକ କରି ସିଆରପି ହାତରେ ସୁଜୁଥିବା ଟଙ୍କାକୁ ସିଆରପି ଖାଇଯାଇଛନ୍ତି । ଗ୍ରୁପରୁ ଟଙ୍କା ନେଇ ବ୍ୟାଙ୍କରେ ଜମା ନକରି ଫେରାର ହୋଇଯାଇଛନ୍ତି । ଯାହା ଜଣାଇବା ପରେ ଏବେ ଚିନ୍ତାରେ ଗ୍ରୁପ୍ ସଦସ୍ୟା ।
ତେବେ ଟଙ୍କା ହଡପ କରିଥିବା ମହିଳା ସିଆରପି ଜଣକ ସେହି ଗାଁର ହୋଇଥିବାରୁ ପ୍ରଥମେ ସମସ୍ତ ମହିଳା ଗୋଷ୍ଠୀ ଗାଁ କମିଟିରେ ଜଣାଇଥିଲେ । ଗାଁରେ ମଧ୍ୟ ବୈଠକ ବସି ଏହାର ବିଚାର କରାଯାଇଥିଲା । କିନ୍ତୁ ସେ ମହିଳା ଗାଁ ଛାଡି କେଉଁ ଆଡେ ପଳାଇଥିବାରୁ କୌଣସି ନିଷ୍ପତି ହୋଇପାରିଲା ନାହିଁ ।
ଫଳରେ ଗାଁ କମିଟି ଏହାକୁ ନେଇ ଥାନା ଓ ଜିଲ୍ଲାପାଳଙ୍କ ଦ୍ବାରସ୍ଥ ହେବ ବୋଲି ଜଣାପଡିଛି । ସେପଟେ ଓଡିଶା ଜୀବିକା ମିଶନର ପ୍ରୋଜେକ୍ଟ ମ୍ୟାନେଜର ଏବାବଦରେ କ୍ୟାମେରା ସାମ୍ନାରେ କିଛି କହିବେ ନାହିଁ ବୋଲି କହିଛନ୍ତି । ହେଲେ ତଦନ୍ତ କରାଯାଇ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶୃତି ଦେଇଛନ୍ତି ।
ଏହି ଘଟଣା କେବଳ ଭଗତପୁରରେ ଘଟିଛି ତାହା ନୁହେଁ ଏପରି ଘଟଣା ଜିଲ୍ଲାର ଅନେକ ସ୍ଥାନରେ ଘଟିଥିବା ଜଣାପଡୁଛି । ଯାହା ଓଡିଶା ଜୀବିକା ମିଶନର କାର୍ଯ୍ୟ ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରୁଛି ।
ଅନୁଗୋଳ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
