ଅନୁଗୋଳ: ନାଲକୋ ଥାନା ବଳରାମ ପ୍ରସାଦ କେନ୍ଦୁପାଟଣା ସାହିରେ ଯୁବକଙ୍କୁ ମରଣାନ୍ତକ ଆକ୍ରମଣ । ଗୋଡାଇ ଗୋଡାଇ କଟୁରିରେ ହାଣିଲେ ଦୁଇ ଦୁର୍ବୃତ୍ତ । ଆକ୍ରମଣର ଶିକାର ଯୁବକକୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ତାଙ୍କ ନାମ ସୁଧୀର ବେହେରା ବୋଲି ଜଣାପଡ଼ିଛି । ତେବେ ସେ ଆସପଣ୍ଡ-୧ ଅଞ୍ଚଳକୁ ଯାଇଥିବା ବେଳେ ତାଙ୍କୁ ଦୁଇ ଦୁର୍ବୃତ୍ତ ଆକ୍ରମଣ କରିଥିଲେ ।
ସୂଚନା ଅନୁଯାୟୀ, କେନ୍ଦୁପାଟଣା ସାହିର ସୁଧୀର ବେହେରା ନିଜ ଗାଈ ଖୋଜିବାକୁ ଯାଇଥିବା ବେଳେ ହଠାତ ଏକ ଦୁଇଚାକିଆ ନମ୍ବର ବିହୀନ ଗାଡିରେ ଦୁଇଜଣ ଯୁବକ ଆସି ଏକ କଟୁରିରେ ଯୁବକଙ୍କୁ ଆକ୍ରମଣ କରିଥିଲେ । ସୁଧୀର ପ୍ରାଣ ବିକଳରେ ଦୌଡ଼ିଥିବା ବେଳେ ସେମାନେ ଗୋଡ଼ାଇ ଗୋଡ଼ାଇ ସୁଧୀରଙ୍କୁ ପିଠିକୁ ହାଣିଥିଲେ । ଏଥିରେ ସୁଧୀରଙ୍କ ଚିତ୍କାର ଶୁଣି ଆଖ ପାଖରେ ଥିବା ଲୋକ ଘଟଣାସ୍ଥଲରେ ପହଞ୍ଚିବା ବେଳକୁ ଦୁର୍ବୃତ୍ତମାନେ ଗାଡି, ମାରଣାଅସ୍ତ୍ର ଓ ହେଲମେଟ୍ ଛାଡି ପଳାଇଯାଇଥିଲେ ।
ଖବର ପାଇ ନାଲକୋ ପୁଲିସ ପହଞ୍ଚି ଗାଡି, ମାରଣାଶସ୍ତ୍ର ଜବତ କରି ତଦନ୍ତ ଜାରି ରଖିଛି । ତେବେ ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ଆକ୍ରମଣ ହୋଇଥିବା ଜଣା ପଡ଼ିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
