ଅନୁଗୋଳ: ଜିଲ୍ଲାର ବଅଁରପାଳ ବ୍ଳକ ମହୀଧରପୁର ତନ୍ତିସାହିର ପ୍ରାୟ 50ଟି ବୁଣାକାର ପରିବାର ଏବେ ଦୁର୍ଦ୍ଦିନରେ। ଦିନ ଥିଲା ତନ୍ତବାୟ ସମବାୟ ସମିତି ଚାଲିଥିଲା। ପରିବାରର ପୁରୁଷ ଓ ମହିଳା ମାନେ ବିଭିନ୍ନ ପ୍ରକାଣ ଶାଢୀ, ଲୁଙ୍ଗି, ଗାମୁଛା ଆଦି ବୁଣି ବେଶ ଭଲରେ ଥିଲେ। ହେଲେ ତାହା ବନ୍ଦ ହୋଇଯିବା ପରେ ସେମାନେ ଜୀବିକା ହରାଇ ବସିଛନ୍ତି । ମହିଳା କେବଳ ସେହି ଚିରାଚରିତ ପୁରୁଣା ଢଙ୍ଗରେ ବିଭିନ୍ନ ପ୍ରକାର ବ୍ରତ ତିଆରି କରି ପେଟ ପୋଷୁଛନ୍ତି । ଯାହା ଉପରେ ପଡୁନାହିଁ ସରକାରଙ୍କ ନଜର ।
ଅନୁଗୋଳ ଜିଲ୍ଲା ମହୀଧରପୁରର ତନ୍ତି ସାହି । ଜିଲ୍ଲାର ବ୍ରତ ଗାଁ ଭାବେ ବେସ ଜଣାଶୁଣା । କାହିଁକି ନା ଏଠାରେ ହିଁ କେବଳ ତିଆରି ହୁଏ ଭଳିକି ଭଳି ବ୍ରତ। ସୁଦଶା ବ୍ରତ ଠାରୁ ଆରମ୍ଭ କରି ତାରିଣୀ , ଗୁରୁବାର ଆଦି ଯେତେ ଠାକୁର ଠାକୁରାଣୀଙ୍କ ପାଖରେ ବ୍ରତ ପୂଜା ହୁଏ ସେସବୁ ଏହି ସାହିରେ ହିଁ ତିଆରି କରାଯାଏ । ଯେଉଁ ବ୍ରତକୁ ତିଆରି କରନ୍ତି ଏଠାକାର ମହିଳା। ନିଜର କୌଳିକ ବୃତ୍ତି ଲୁଗାବୁଣା ବୁଡିଯିବା ପରେ ଏହି ବ୍ରତ ତିଆରି କରି ବୃତ୍ତିକୁ ବଞ୍ଚାଇବାକୁ ଚେଷ୍ଟା ଚଲାଇଛନ୍ତି ଏହି ବୁଣାକାର ପରିବାର ।
ଦିନଥିଲା ଏହି ସାହିର ଲୋକେ ଲୁଗା ବୁଣି ବେଶ୍ ଲାଭବାନ ହେଉଥିଲେ। । ୧୯୬୫ ମସିହାରେ ଏଠାରେ ଏକ ତନ୍ତ ସମବାୟ ସମିତି , ୩୫ ଟି ତନ୍ତ ମଧ୍ୟ ଥିଲା । ୧୯୯୦ ମସିହା ବେଳକୁ ଏସବୁ ବନ୍ଦ ହୋଇଗଲା । ତାପରଠାରୁ ତନ୍ତର ପୁନରୁଦ୍ଧାର ପାଇଁ କୈାଣସି ସ୍ତରରେ ଉଦ୍ୟମ ହେଲା ନାହିଁ। ତେଣୁ ଏଠାରେ ରହୁଥିବା ୫୦ରୁ ଅଧିକ ପରିବାର ଜୀବିକା ହରାଇଲେ। ଆଉ ଏବେ ନିଜେ ବଞ୍ଚବା ସହ ବୃତ୍ତି ବଞ୍ଚାଇବା ପାଇଁ ଏହି ବ୍ରତ ତିଆରି କରୁଛନ୍ତି ।
ଏମାନକୁ ଏବେ ନାଁ ସୁବିଧାରେ ସୂତା ମିଳୁଛି ନାଁ ଅଛି ବିକ୍ରି ପାଇଁ ବଜାର ସୁବିଧା। ବାଧ୍ୟହୋଇ ବାହାରୁ ଆସୁଥିବା ବେପାରୀଙ୍କୁ ତିଆରି କରୁଥିବା ବ୍ରତକୁ ଖୁବ କମ୍ ଦରରେ ବିକୁଛନ୍ତି । ତେବେ ଜିଲ୍ଲାରେ ବୟନ ଶିଳ୍ପ ବିଭାଗର କାର୍ଯ୍ୟାଳୟ ନଥିବା ବେଳେ ଏହା ଢେଙ୍କାନାଳରୁ ପରିଚାଳିତ ହେଉଛି। ଏନେଇ ଅଧିକାରୀ କହିଛନ୍ତି ଯାହା ସରକାରୀ ଯୋଜନା ଅଛି ସେଥିରେ ସେମାନଙ୍କୁ ସାମିଲ କରାଯିବ ।
ତନ୍ତ ଲୋପ ପାଇ ଯାଇଥିଲେ ମଧ୍ୟ ମହିଳାମାନେ କେତେକାଂଶରେ ବଞ୍ଚାଇ ରଖିପାରିଛନ୍ତି ସେମାନଙ୍କର ପାରମ୍ପରିକ ବୃତ୍ତି । ସରକାରୀ ପ୍ରୋତ୍ସାହନ ମିଳିଲେ ସେମାନେ ଆହୁରି ଆଗକୁ ଯାଇପାରିବେ ବୋଲି କହିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ ଇଟିଭି ଭାରତ
