ଅନୁଗୋଳ: ଚାଷ କରିବାର ନିଶା । ଯାହାଙ୍କ ଇଚ୍ଛା ନିକଟରେ ହାର ମାନିଛି ବୟସ । 85 ବର୍ଷ ବୟସରେ ବି ଚାଷ କରି ଉପାର୍ଜନ କରୁଛନ୍ତି ଲକ୍ଷ ଲକ୍ଷ ଟଙ୍କା । ଖାଲି ସେତିକି ନୁହେଁ ତାଙ୍କ ପାଇଁ ରୋଜଗାର ପାଉଛନ୍ତି ଗାଁ ର 20 ପରିବାର । ତାଙ୍କ କ୍ଷେତରେ କାମ କରି ଅନ୍ୟମାନେ ବି ହୋଇପାରିଛନ୍ତି ରୋଜଗାର କ୍ଷମ । ଏଭଳି ଜଣେ ସଫଳ ଚାଷୀ ଅଛନ୍ତି ଅନୁଗୋଳ ଜିଲ୍ଲାରେ । ନାଁ ପୀତାମ୍ବର ଦେହୁରୀ । ବୟସ ୮୫ ବର୍ଷ । ପରିଣତ ବୟସ ରେ ତାଙ୍କର ଚାଷ କରିବାର ନିଶା । ଦୃଢ ଇଚ୍ଛା ଶକ୍ତି ଆଗରେ ହାର ମାନିଛି ତାଙ୍କର ବୟସ ।
ନିଜ ଜମିରେ ଚାଷ କରି ପ୍ରତି ବର୍ଷ ଲକ୍ଷ ଲକ୍ଷ ତାଙ୍କ ଲାଭ କରନ୍ତି ପିତାମ୍ବର । ମୁଖ୍ୟତଃ ଲେମ୍ବୁ ଚାଷ କରି ପୀତାମ୍ବର ଏହି ଲାଭ ପାଆନ୍ତି । ଖାଲି ଯେ ନିଜେ ଲାଭ ପାଆନ୍ତି ତାହା ନୁହେଁ ତାଙ୍କ କ୍ଷେତରେ ଅନ୍ୟମାନଙ୍କୁ କାମ କରାଇ ରୋଜଗାର ମଧ୍ୟ ଦିଅନ୍ତି । ପୀତାମ୍ବର ନିଜର ପ୍ରାୟ ୮ ଏକର ଜମିରେ ଲେମ୍ବୁ , ୪ ରୁ ୫ ଏକର ଜମିରେ ବାଇଗଣ ଓ ଅନ୍ୟାନ୍ୟ ପନିପରିବା ମଧ୍ୟ ଚାଷ କରନ୍ତି । ବର୍ଷ ତମାମ ପିତାମ୍ବର ନିଜ କ୍ଷେତରେ ହିଁ ବ୍ୟସ୍ତ ରୁହନ୍ତି । ସକାଳ ହେଲେ ପିତାମ୍ବର ନିଜ ଗାଡି ଧରି ବାହାରି ପଡନ୍ତି କ୍ଷେତକୁ । ଆଉ ଲାଗି ପଡନ୍ତି କାମରେ । ବୟସ ଅଧିକ ହୋଇଥିବାରୁ ପରିବାର ଆକଟ କଲେବି କାହାରି କଥା ଶୁଣନ୍ତି ନାହିଁ ସେ ।
ଅନୁଗୋଳ ବ୍ଲକ ହିଡସିଙ୍ଗ ଗାଁରେ ପୀତାମ୍ବରଙ୍କ ଘର । ପରିବାର ଲୋକେ ଅନ୍ୟତ୍ର ଆସି ରହୁଥିବା ବେଳେ ଏକାକୀ ନିଜ ଘରେ ରହି ପୀତାମ୍ବର ନିଜର କ୍ଷେତବାଡି ଦେଖାଶୁଣା କରିବା ସହ ଚାଷ କରନ୍ତି । ସମଗ୍ର ବ୍ଲକରେ ମଧ୍ୟ ସେ ଜଣେ ବଡ ଚାଷୀ ଭାବେ ବେଶ ଜଣାଶୁଣା । ଏତେ ବୟସରେ ବି ସେ ନିଜେ ରୋଜଗାର କରିବା ସହ ତାଙ୍କ ପାଇଁ ୨୦ ପରିବାର ରୋଜଗାର ପାଇଛନ୍ତି । ଯାହା ପାଇଁ ଗାଁ ରେ ମଧ୍ୟ ତାଙ୍କୁ ସମସ୍ତେ ଆଦର କରନ୍ତି ।
ପରିଣତ ବୟସରେ ପୀତାମ୍ବରଙ୍କ ଭଳି ଚାଷ କରିବାର ନିଶା ନିଶ୍ଚିତ ଅନ୍ୟମାନଙ୍କ ପାଇଁ ଉଦାହରଣ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥଙ୍କ ରିପୋର୍ଟ, ଇଟିଭି ଭାରତ
