ନୂଆଦିଲ୍ଲୀ: ଆନ୍ଦୋଳନରତ କୁସ୍ତିଯୋଦ୍ଧାଙ୍କୁ ସମର୍ଥନ କରି ଦିନକୁ ଦିନ ଅନେକ ଖେଳାଳି ସାମ୍ନାକୁ ଆସୁଛନ୍ତି । ଏହାରି ମଧ୍ୟରେ ୧୯୮୩ ମସିହାରେ ଭାରତକୁ ପ୍ରଥମ ବିଶ୍ବକପ ଦେଇଥିବା କପିଲ ଦେବଙ୍କ ନେତୃତ୍ବାଧୀନ ଦଳ ଆଜି କୁସ୍ତିଯୋଦ୍ଧାଙ୍କ ସମର୍ଥନରେ ବୟାନ ଜାରି କରିଛନ୍ତି । ଗତ ମେ ୨୮ରେ ଆଇନ ଶୃଙ୍ଖଳା ପରିସ୍ଥିତି ଉପୁଯାଇଥିବା ଅଭିଯୋଗରେ ଦିଲ୍ଲୀ ପୋଲିସ କୁସ୍ତିଯୋଦ୍ଧା ମାନଙ୍କୁ ଯନ୍ତରମନ୍ତରରୁ ଉଠାଇ ନେଇଥିଲା । ଏହାପରେ ମେ ୩୦ରେ ବିନେଶ ଫୋଗଟ, ସାକ୍ଷୀ ମଲ୍ଲିକଙ୍କ ସମେତ ବଜରଙ୍ଗ ପୁନିଆ ପ୍ରମୁଖ ପୂର୍ବରୁ ଦେଶ ପାଇଁ ଜିତିଥିବା ପଦକକୁ ଗଙ୍ଗାରେ ବିସର୍ଜ୍ଜନ କରିଦେବା ପାଇଁ ନିଷ୍ପତ୍ତି ନେଇ ହରିଦ୍ବାରରେ ପହଞ୍ଚିଥିଲେ । ଯଦିଓ ସେମାନେ ଏବେ ପର୍ଯ୍ୟନ୍ତ ନିଜ ନିଜର ପଦକକୁ ଗଙ୍ଗାରେ ଭସାଇ ନାହାନ୍ତି, ହେଲେ ଏହାକୁ ନେଇ ଚିନ୍ତା ପ୍ରକଟ କରିଛି ୧୯୮୩ ମସିହାରେ ବିଶ୍ବକପ ବିଜେତା ଦଳ । ତୁରନ୍ତ ଏହି ସମସ୍ୟାର ସମାଧାନ ହେବ ବୋଲି ସେମାନେ ଆଶା ପ୍ରକାଶ କରିଛନ୍ତି ।
୧୯୮୩ ମସିହାରେ ବିଶ୍ବକପ ବିଜେତା ଦଳ ନ୍ୟୁଜ ସଂସ୍ଥା ପିଟିଆଇକୁ ଦେଇଥିବା ବୟାନରେ କହିଛନ୍ତି, "ଆମ ଦେଶର ଗୌରବ କୁସ୍ତିଯୋଦ୍ଧା ମାନଙ୍କ ସହିତ ଅସଦାଚରଣର ଖବରରେ ଆମେ ଗଭୀର ଦୁଃଖିତ । ସେମାନେ କଠିନ ପରିଶ୍ରମ କରି ଦେଶ ପାଇଁ ଜିତିଥିବା ପଦକକୁ ଗଙ୍ଗାରେ ବିସର୍ଜ୍ଜନ କରିବାକୁ ଚିନ୍ତା କରୁଥିବା ଶୁଣି ଆମକୁ ଚିନ୍ତା ହେଉଛି । ସେମାନେ ଜିତିଥିବା ପଦକ ପଛରେ ବର୍ଷ ବର୍ଷର ପ୍ରୟାସ, ବଳିଦାନ, ସମର୍ପଣ ଓ ପରିଶ୍ରମ ରହିଛି । ସେହି ପଦକ ଗୁଡ଼ିକ କେବଳ କୁସ୍ତିଯୋଦ୍ଧାଙ୍କର ନୁହେଁ, ବରଂ ଦେଶର ଗୌରବ ଅଟେ । ତେଣୁ ଏହି ମାମଲାରେ ତରବରିଆ ଭାବେ କୌଣସି ନିଷ୍ପତ୍ତି ନନେବା ପାଇଁ ଆମେ ସେମାନଙ୍କୁ ଅନୁରୋଧ କରୁଛୁ । ସେମାନଙ୍କର ଅଭିଯୋଗ ଶୁଣାଯିବ ବୋଲି ଆମେ ଆଶା କରୁଛୁ । ସେମାନଙ୍କ ସମସ୍ୟାର ସମାଧାନ ନିଶ୍ଚୟ ହେବ । ଆଇନକୁ ତାର କାମ କରିବାକୁ ଦିଆଯାଉ ।"
