ନୂଆଦିଲ୍ଲୀ: ଏସିଆନ ୟୁଥ୍ ବକ୍ସିଂ ଚମ୍ପିଆନସିପରେ ୬ ସ୍ବର୍ଣ୍ଣ ପଦକ ହାସଲ କଲେ ଭାରତୀୟ ବକ୍ସର । କେବଳ ସ୍ବର୍ଣ୍ଣ ନୁହେଁ ଭାରତୀୟ ବକ୍ସରମାନେ ୯ଟି ରୌପ୍ୟ, ୫ଟି କାଂସ୍ୟ ପଦକ ମଧ୍ୟ ହାସଲ କରିଛନ୍ତି । ଏହାକୁ ନେଇ ଭାରତୀୟ ବକ୍ସିଂ ଫେଡେରେସନ ଟ୍ବିଟ୍ କରି ସୂଚନା ଦେଇଛି ।
ମହିଳା ବିଭାଗର ୬୦ କେଜି ବର୍ଗରେ ପ୍ରୀତି ଦହିୟା, ୬୬ କେଜି ବର୍ଗରେ ସ୍ନେହା କୁମାରୀ, ୭୫ କେଜି ବର୍ଗରେ ଖୁସି ଓ ୫୪ କେଜି ବର୍ଗରେ ନେହା ସ୍ବର୍ଣ୍ଣ ପଦକ ହାସଲ କରିଛନ୍ତି । ମହିଳା ବିଭାଗ ବକ୍ସିଂରେ ମୋଟ ୧୦ ଭାରତୀୟ ମହିଳା ଖେଳାଳି ଫାଇନାଲକୁ ପ୍ରବେଶ କରିଥିଲେ । ପ୍ରୀତି କାଜାଖିସ୍ତାନର ଖେଳାଳିଙ୍କୁ ୩-୨ରେ ମାତ ଦେଇ ସ୍ବର୍ଣ୍ଣ ପଦକ ହାସଲ କରିଛନ୍ତି । ସ୍ନେହା ଦୁବାଇର ରମାହ ଖଲଫାନଙ୍କୁ ୩-୦ରେ ମାତ ଦେଇଥିଲେ । ଖୁସି ମଧ୍ୟ କାଜଖିସ୍ତାନ ବକ୍ସରଙ୍କୁ ୩-୦ରେ ପରାଜିତ କରିଛନ୍ତି ।
ସେପଟେ ପୁରୁଷ ବିଭାଗର ୫୧ କେଜି ବର୍ଗରେ ଭାରତ ବିଶ୍ବାମିତ୍ର ଚୋଙ୍ଗଥାମ ସ୍ବର୍ଣ୍ଣ ପଦକ ହାସଲ କରିଛନ୍ତି । ଏହାସହ ୮୦ କେଜି ବର୍ଗରେ ବଶାଲ ମଧ୍ୟ ସ୍ବର୍ଣ୍ଣ ପଦକ ହାସଲ କରି ଭାରତକୁ ଗୌରବାନ୍ବିତ କରିଛନ୍ତି । ମହିଳା ବିଭାଗ ରୌପ୍ୟ ପଦକ ବିଜେତାମାନଙ୍କ ମଧ୍ୟରେ ୮୧ କେଜିରେ ତନିଷା ସାନ୍ଧୁ ୪୮ କେଜି ବର୍ଗରେ ନିବେଦିତା, ୫୦ କେଜି ବର୍ଗରେ ତମନ୍ନା ଓ ୫୨ କେଜି ବର୍ଗରେ ସିମରନ ରହିଛନ୍ତି । ସେହିଭଳି ପୁରୁଷ ବିଭାଗର ୪୮ କେଜି ବର୍ଗରେ ବିଶ୍ବନାଥ ସୁରେଶ, ୬୩ କେଜି ବର୍ଗରେ ବଂଶଜ, ୭୧ କେଜି ବର୍ଗରେ ଜୟଦୀବ ରୌପ୍ୟ ପଦକ ହାସଲ କରିଛନ୍ତି ।
ଚଳିତ ବର୍ଷ ଏସିଆନ ୟୁଥ୍ ଚମ୍ପିଆନସିପରେ ଭାରତ ୬ଟି ସ୍ବର୍ଣ୍ଣ ପଦକ ସହ ମୋଟ ୨୦ଟି ପଦକ ହାସଲ କରିଛି । ଗତଥର ଭାରତ ୫ଟି ସ୍ବର୍ଣ୍ଣ ପଦକ ସହ ଭାରତ ମୋଟ ୧୨ ପଦକ ହାସଲ କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
