ହାଇଦ୍ରାବାଦ : ଆଇସିସି ନାମରେ ସାଂଘାତିକ ଅଭିଯୋଗ ଆଣିଲେ ପାକିସ୍ତାନର ପୂର୍ବତନ ଅଧିନାୟକ ସାହିଦ ଆଫ୍ରିଦି । ଭାରତ ସେମିଫାଇନାଲ ଟିକଟ ହାତେଇବାରେ ସକ୍ଷମ ହେଉ ଏନେଇ ଆଇସିସି ଭାରତକୁ ସମର୍ଥନ କରୁଛି ବୋଲି କହିଛନ୍ତି ପାକିସ୍ତାନର ଏହି ପୂର୍ବତନ କ୍ରିକେଟର । ପାକିସ୍ତାନର ଏକ ମିଡିଆ ସୋ’ରେ ସାହିଦ ଆଫ୍ରିଦି ଅନ୍ତର୍ଜାତୀୟ କ୍ରିକେଟ ପରିଷଦ ନାମରେ ଏଭଳି ଅଭିଯୋଗ କରିଛନ୍ତି । ନଭେମ୍ବର ୨ ତାରିଖ ବୁଧବାର ଭାରତକୁ ବାଂଲଦେଶ ୫ ରନରେ ପରାସ୍ତ କରିଥିଲା । ଏହି ବିଜୟ ସତ୍ତ୍ବେ ଟିମ ଇଣ୍ଡିଆ ୬ ପଏଣ୍ଟ ହାସଲ କରି ସେମିଫାଇନାଲ ରାସ୍ତା ସହଜ କରିଛି । ତେବେ ଭାରତ ବାଂଲାଦେଶକୁ ପରାସ୍ତ କରିବା ଘଟଣାକୁ ସହଜରେ ହଜମ କରି ପାରିନାହିଁ ପାକିସ୍ତାନ ।
ପାକିସ୍ତାନର ଏକ ଟିଭି କାର୍ଯ୍ୟକ୍ରମରେ ସାହିଦ ପାକିସ୍ତାନର ପୂର୍ବତନ କ୍ରିକେଟର ନିଜର ବିଷ ଓଗାଳିଛନ୍ତି । ସେ କହିଛନ୍ତି, "ଆପଣ ଦେଖିଥିବେ କି ମଇଦାନ ବର୍ଷା କାରଣରୁ ଓଦା ରହିଥିଲା । ହେଲେ ଆଇସିସିର ସମର୍ଥନ ଭାରତ ସହିତ ରହିଛି । ଆଇସିସି ଏହା ସୁନିଶ୍ଚିତ କରିବାକୁ ଚାହୁଁଛି କି ଭାରତ ସହଜରେ ସେମିଫାଇନାଲରେ ପ୍ରବେଶ କରୁ । ସେଥିପାଇଁ କ୍ରିକେଟ ମଇଦାନରେ ଭାରତୀୟ ଖେଳାଳି କୌଣସି ଭୁଲ କଲେ ତାହା ଆଇସିସି ନଜରରେ ପଡୁନାହିଁ । ଆପଣ ଏହା ନଜର ପକାଇଥିବେ ଯେ ଭାରତ ବନାମ ପାକିସ୍ତାନ ମ୍ୟାଚରେ ଯେଉଁ ଅମ୍ପୟାର ରହିଥିଲେ । ସେହି ଅମ୍ପୟାର ଭାରତ ବାଂଲାଦେଶ ବିପକ୍ଷ ମ୍ୟାଚରେ ଅମ୍ପାୟାରିଂ କରୁଥିଲେ । ଏହା ପରେ ସେମାନଙ୍କୁ ସର୍ବଶ୍ରେଷ୍ଠ ଅମ୍ପୟାର ପୁରସ୍କାର ମିଳିବ ।"
ନଭେମ୍ବର ୨ ତାରିଖରେ ଖେଳାଯାଇଥିବା ସୁପର ୧୨ ପର୍ଯ୍ୟାୟ ମ୍ୟାଚରେ ଭାରତ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୬ ୱିକେଟ ହରାଇ ୧୮୪ ରନ କରିଥିଲା । ୧୮୫ ରନର ବିଜୟ ଲକ୍ଷ୍ୟ ନେଇ ମଇଦାନକୁ ଓହ୍ଲାଇଥିଲା ସାକିବ ଅଲ ହାସନ ଦଳ । ଆରମ୍ଭରୁ ବାଂଲାଦେଶ ଜବରଦସ୍ତପାଳି ଖେଳିଥିଲା । ଲିଟନ ଦାସ ୨୧ ବଲରୁ ଅର୍ଦ୍ଦଶତକୀୟ ଇନିଂସ ଖେଳିଥିଲେ । ହେଲେ ହଠାତ୍ ବାଂଲାଦେଶ ବିଜୟ ରାସ୍ତାରେ ଖଳନାୟକ ସାଜିଥିଲା ବର୍ଷା । ବର୍ଷା କାରଣରୁ କିଛି ସମୟ ମ୍ୟାଚ ସ୍ଥଗିତ ରହିଥିଲା । ସେତେବେଳକୁ ଦଳର ସ୍କୋର ବୋର୍ଡ କୌଣସି ୱିକେଟ ନ ହରାଇ ୭ ଓଭରରେ ୬୬ ରନ ରହିଥିଲା । ବର୍ଷା ବନ୍ଦ ହେବା ପରେ DLS ମେଥଡ ଅନୁଯାୟୀ ବାଂଲାଦେଶକୁ ୧୬ ଓଭରରେ ୧୫୧ ରନର ଟାର୍ଗେଟ ଦିଆଯାଇଥିଲା ।
ଏନେଇ ସାହିଦ ଆଫ୍ରିଦି କହିଛନ୍ତି, "ଦଳକୁ ବିଜୟ ଦ୍ବାରରେ ପହଁଞ୍ଚାଇବା ପାଇଁ ଲିଟନ ଦାସ ଜବରଦସ୍ତ ଇନିଂସ ଜାରି ରଖିଥିଲେ । 6 ଓଭର ପର୍ଯ୍ୟନ୍ତ ଆମକୁ ଲାଗୁଥିଲା ଥିଲା ଯଦି ବାଂଲାଦେଶର ଆଉ ୨-୩ ଓଭର ପର୍ଯ୍ୟନ୍ତ ୱିକେଟ ନ ପତନ ନ ଘଟିବ ତାହେଲେ ସେମାନଙ୍କ ସପକ୍ଷରେ ମ୍ୟାଚ ଯାଇଥାନ୍ତେ ।"
ସେପଟେ ଏହି ମ୍ୟାଚରେ ପରାସ୍ତ ହେବା ପରେ କୋହଲିଙ୍କ ବିରୋଧରେ ଏକ ଅଭିଯୋଗ ଆଣିଥିଲେ ବାଂଲାଦେଶର ଉପ ଅଧିନାୟକ ନୁରୁଲ ହାସନ । ମ୍ୟାଚ୍ରେ କୋହଲି ଫେକ୍ ଥ୍ରୋ କରିଥିବା ଅଭିଯୋଗ କରିଛନ୍ତି ନୁରୁଲ ହାସନ । ଅମ୍ପାୟାର ନଜରରେ ଏହା ପଡ଼ି ନଥିଲା । ଯାହାଫଳରେ ବାଂଲାଦେଶକୁ ୫ ରନ୍ ଅତିରିକ୍ତ ମିଳି ପାରିଥାଆନ୍ତା ବୋଲି କହିଛନ୍ତି ନୁରୁଲ ।
