ବାଲେଶ୍ବର: ପୁଡ଼ୁଚେରୀରେ ଆୟୋଜିତ ସର୍ବ ଭାରତୀୟ ସ୍ବାସ୍ଥ୍ୟ ପ୍ରତିଯୋଗିତାରେ ବାଲେଶ୍ଵରର 65 ବର୍ଷୀୟ ତରୁଣ ଚାଟାର୍ଜୀ ହାସଲ କରିଛନ୍ତି ସ୍ବର୍ଣ୍ଣ ପଦକ । ଏହି ସଫଳତା ପାଇଁ ତାଙ୍କୁ ଏବେ ପ୍ରଶଂସାର ସୁଅ ଛୁଟୁଛି । ସାଧାରଣତଃ ୫୦ ବର୍ଷ ଟପିଲେ ଶରୀରର ଶକ୍ତି ହ୍ରାସ ହୋଇଥାଏ । ସେମାନେ ସେତେବେଳେ ସ୍ବାସ୍ଥ୍ୟ ଉପରେ ବିଶେଷ ଗୁରୁତ୍ବ ଦେଇପାରନ୍ତି ନାହିଁ । ମାତ୍ର ସୁସ୍ଥ ମଣିଷ ତରୁଣ ଚାଟାର୍ଜୀ ଚାକିରୀରୁ ଅବସର ନେବାପରେ ଅରମ୍ଭ କରିଥିଲେ ବଡ଼ି ବିଲଡ଼ିଂ । ତାଙ୍କର ସାଧନା ପାଇଁ ସେ ପାଇପାରିଛନ୍ତି ସର୍ବଭାରତୀୟ ସ୍ତରରେ ସ୍ବର୍ଣ୍ଣ ପଦକ । ତରୁଣ ନିଜ ଶରୀରକୁ ସୁସ୍ଥ ରଖିବାପାଇଁ ଦିନରେ ୫ରୁ ୬ ଘଣ୍ଟା ବ୍ୟାୟାମ କରିଥାନ୍ତି।
ନିଜ ଶରୀରକୁ ସୁସ୍ଥ ରଖିବା ସହ ଅନ୍ୟମାନଙ୍କ ଶରୀର କେମିତି ସୁସ୍ଥ ରହିବ ସେଥିପ୍ରତି ମଧ୍ୟ ଗୁରୁତ୍ବ ଦେଇଥାନ୍ତି । ତରୁଣ ପୂର୍ବରୁ ଓଡ଼ିଶା ଭିତରେ କିଛି ସଫଳତା ଲାଭ କରିଥିବା ବେଳେ ଗତମାସ ୨୨ ଓ ୨୩ ତାରିଖରେ ପୁଡ଼ୁଚେରୀରେ ଆୟୋଜିତ ସର୍ବଭାରତୀୟ ସ୍ତରୀୟ ବଡ଼ିବିଲଡ଼ିଂ ପ୍ରତିଯୋଗୀତାରେ ୬୦ବର୍ଷରୁ ଉର୍ଦ୍ଧ୍ବ ବର୍ଗରେ ଅଂଶଗ୍ରହଣ କରି ସ୍ବର୍ଣ୍ଣ ପଦକ ହାସଲ କରିପାରିଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
