ନୂଆଦିଲ୍ଲୀ: ଖୁବଶୀଘ୍ର ଭାରତୀୟ ଫୁଟବଲ୍ ଦଳର ମୁଖ୍ୟ କୋଚ ଚୟନ ପ୍ରକ୍ରିୟା ଶେଷ ହେବ। ଅଖିଳ ଭାରତୀୟ ଫୁଟବଲ୍ ମହାସଂଘର ଅଧ୍ୟକ୍ଷ ପ୍ରଫୁଲ୍ଲ ପଟେଲ ଏ ନେଇ ସୂଚନା ଦେଇଛନ୍ତି । ଏଆଇଏଫ୍ଏଫ୍କୁ ଏହି ପଦ ନିମନ୍ତେ 250ରୁ ଊର୍ଦ୍ଧ୍ବ ଆବେଦନ ପତ୍ର ମିଳିଛି । ଏହି ଆବେଦନର ଅନ୍ତିମ ତାରିଖ 29 ମାର୍ଚ୍ଚ ଥିଲା।
ସୂଚନାଥାଉକି, ଏଏଫ୍ସି ଏସିଆ କପ୍ରେ ଭାରତ ନକ୍ ଆଉଟ୍ ମ୍ୟାଚ୍ରେ ପହଞ୍ଚି ପାରିନଥିଲା । ଏହାପରେ ଷ୍ଟିଫେନ୍ କାଷ୍ଟେନଟାଇନ କୋଚ୍ ପଦରୁ ଇସ୍ତଫା ଦେଇ ଦେଇଥିଲେ। ସେବେଠାରୁ ଏହି ପଦ ଖାଲି ପଡିଛି ।
ତେବେ ଆବେଦନକାରୀଙ୍କ ମଧ୍ୟରେ 35 ଜଣ ହେଉଛନ୍ତି ୟୁରୋପ ଓ ଅନ୍ୟ ଦେଶର ଜଣାଶୁଣା କୋଚ୍।
ପଟେଲ କହିଛନ୍ତି ଯେ, ଆବେଦନକାରୀଙ୍କ ମଧ୍ୟରୁ ଯୋଗ୍ୟତା ଭିତ୍ତିରେ କୋଚ ଚୟନ ପ୍ରକ୍ରିୟା ସମ୍ପନ୍ନ ହେବ। ଶୀଘ୍ର ହିଁ ଏହି ପଦରେ ନିଯୁକ୍ତି ଦିଆଯିବ। ସମ୍ଭବତଃ ଏହି ମାସର ଶେଷ ସୁଦ୍ଧା ନୂଆ କୋଚ ଯୋଗ ଦେବେ।
ଖବରମୁତାବକ, ଭାରତୀୟ ଟିମ୍ର କୋଚ୍ ନିମନ୍ତେ ଇଟାଲୀର ଜିୟୋଓ୍ବାନ୍ନୀ ଡି ବିୟାସୀ, ସ୍ବିଡେନ୍ର ହକାନ ଏରିକ୍ସନ, ଫ୍ରାଞ୍ଚର ରେମଣ୍ଡ ଡୋମେନେକ ଓ ଇଂଲଣ୍ଡର ସେମ୍ ଆଲାର୍ଡିସ ପ୍ରମୁଖଙ୍କ ନାମ ଆଗଧାଡିରେ ରହିଛି ।
