କାବୁଲ: ଭେଟେରାନ ଅଲରାଉଣ୍ଡର ମହମ୍ମଦ ନବି ଆଗାମୀ ଟି୨୦ ବିଶ୍ବକପ ପାଇଁ ଆଫଗାନିସ୍ତାନ କ୍ରିକେଟ ଟିମର ଅଧିନାୟକ ନିଯୁକ୍ତ ହୋଇଛନ୍ତି । ଷ୍ଟାର ସ୍ପିନର ରସିଦ ଖାନ ତାଙ୍କ ବିନା ପରାମର୍ଶରେ ଜାତୀୟ ସ୍କ୍ବାଡ ଚୟନକୁ ବିରୋଧ କରି ଅଧିନାୟକ ପଦ ଛାଡିଥିଲେ । ଆଫଗାନିସ୍ତାନ କ୍ରିକେଟ ବୋର୍ଡ(ACB) ଏଯାବତ ନୂଆ ଅଧିନାୟକ ନିଯୁକ୍ତି ନେଇ ଆନୁଷ୍ଠାନିକ ଘୋଷଣା କରିନଥିଲେ ମଧ୍ୟ ନବି ଟ୍ବିଟ ଯୋଗେଁ ଟିମର ନେତୃତ୍ବ ତାଙ୍କୁ ମିଳିଥିବା କହିଛନ୍ତି ।
"ଏହି କଠିନ ସମୟରେ ମୁଁ ACBର ନିଷ୍ପତ୍ତିକୁ ଗ୍ରହଣ କରୁଛି ଓ ଟି୨୦ ଜାତୀୟ କ୍ରିକେଟ ଟିମର ନେତୃତ୍ବ ନେବାକୁ ପ୍ରସ୍ତୁତ," 36 ବର୍ଷୀୟ ନବି ଟ୍ବିଟରେ ଏହା ଉଲ୍ଲେଖ କରିଛନ୍ତି । ଏଥିସହ ଆଗାମୀ ଟି୨୦ ବିଶ୍ବକପରେ ଭଲ ପ୍ରଦର୍ଶନ ନେଇ ଆଶାବାଦୀ ଅଛନ୍ତି । ଇଣ୍ଡିଆନ ପ୍ରିମିୟର ଲିଗ(IPL) ଟିମ ସନରାଇଜର୍ସ ହାଇଦ୍ରାବାଦର ସ୍ପିନ ବୋଲିଂ ଅଲରାଉଣ୍ଡର ଭାବେ ଖେଳୁଛନ୍ତି ନବି ।
ଟି୨୦ ବିଶ୍ବକପ ପାଇଁ ଘୋଷଣା ହୋଇଥିବା ଆଫଗାନିସ୍ତାନ ସ୍କ୍ବାଡ ଚୟନ ସମୟରେ ପରାମର୍ଶ ନିଆଯାଇନଥିବା ଦର୍ଶାଇ ରସିଦ ଖାନ କ୍ୟାପଟେନ ପଦ ଛାଡିଥିଲେ । ଏହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ACB ଫଟାଫଟ କ୍ରିକେଟ ବିଶ୍ବକପ ପାଇଁ ସ୍କ୍ବାଡ ଘୋଷଣା କରିବାର କିଛି ସମୟ ପରେ ରସିଦ କ୍ୟାପଟେନ ପଦ ଛାଡିଥିଲେ । ଟି୨୦ ବିଶ୍ବକର ଅକ୍ଟୋବର ୧୭ରୁ ନଭେମ୍ବର ୧୪ ପର୍ଯ୍ୟନ୍ତ UAE ଓ ଓମାନରେ ଅନୁଷ୍ଠିତ ହେବାନେଇ ହେବ । ତେବେ ଆଫଗାନିସ୍ତାନକୁ ତାଲିବାନ ଦଖଲ କରିବା ପରେ କ୍ରିକେଟ ଟିମ ଉପରେ ଏହାର ପ୍ରଭାବ ପଡିବାକୁ ଯାଉଛି ।
ଆଫଗାନ ମହିଳାଙ୍କୁ କ୍ରିକେଟ ସମେତ ଅନ୍ୟ ଖେଳରେ ଅଂଶଗ୍ରହଣ କରିବାକୁ ତାଲିବାନ ବ୍ୟାନ କରିବା ପରେ ସଙ୍କଟରେ ଆଫଗାନିସ୍ତାନ କ୍ରିକେଟ ଟିମର ଟେଷ୍ଟ ସଦସସ୍ୟତା । ICCର ନୀୟମ ଅନୁଯାୟୀ, ସମସ୍ତ ଟେଷ୍ଟ ଖେଳୁଥିବା ଦେଶର ମହିଳା ଟିମ ମଧ୍ୟ ରହିଥିବା ଆବଶ୍ୟକ ।
ବ୍ୟୁରୋ ରିପୋର୍ଟ, ଇଟିଭି ଭାରତ
