ଦୁବାଇ: ଆଜି(ରବିବାର) IPLରେ ଡବଲ୍ ହେଡର୍ ମ୍ୟାଚ୍ ଦେଖିବାକୁ ମିଳିବ । ଦୁବାଇରେ ଅପରାହ୍ନ ସମୟରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (RCB) କୁ ଭେଟିବ ପଞ୍ଜାବ କିଙ୍ଗ୍ସ(PBKS) । ସେହିପରି ସନ୍ଧ୍ୟା ୭ଟା ୩୦ ମିନିଟରେ କୋଲକାତା ନାଇଟ ରାଇଡର୍ସ ( KKR) କୁ ଭେଟିବ ସନରାଇଜର୍ସ ହାଇଦ୍ରାବାଦ (SRH) । ଉଭୟ ମ୍ୟାଚ୍ ବେଶ୍ ରୋମାଞ୍ଚକର ଏବଂ ଉତ୍କଣ୍ଠାପୂର୍ଣ୍ଣ ହେବ ବୋଲି ଆଶା କରାଯାଉଛି । କାହିଁକିନା ଆଜିର ମ୍ୟାଚ ଉଭୟ ଟିମ୍ ପାଇଁ ଗୁରୁତ୍ବପୂର୍ଣ୍ଣ ରହିଛି ।
RCB ୧୧ଟି ମ୍ୟାଚ ଖେଳି ୧୪ ପଏଣ୍ଟ ସହ ପଏଣ୍ଟ ଟେବୁଲର ତୃତୀୟ ସ୍ଥାନରେ ଥିବାବେଳେ ୧୨ଟି ମ୍ୟାଚ ଖେଳି ୧୦ ପଏଣ୍ଟ ସହ ପଏଣ୍ଟ ଟେବୁଲର ପଞ୍ଚମ ସ୍ଥାନରେ ରହିଛି ପଞ୍ଜାବ କିଙ୍ଗ୍ସ । ଯଦି ଆଜିର ମ୍ୟାଚରେ RCB ବିଜୟୀ ହୁଏ ତେବେ ପ୍ଲେ-ଅଫ ରେ ସ୍ଥାନ ପାଇବାର ଆଶା ଅଧିକ ଉଜ୍ଜିବିତ ହେବ । ସେହିପରି ପଞ୍ଜାବ କିଙ୍ଗ୍ସ ଯଦି ବିଜୟୀ ହୁଏ ତେବେ ପ୍ଲେ-ଅଫ ଦୌଡରେ ରହିବ ଦଳ ।
ସେହିପରି ଆଜି ସନ୍ଧ୍ୟା ସମୟରେ ହେବାକୁଥିବା ମ୍ୟାଚରେ KKR ପାଇଁ ଅଧିକ ଗୁରୁ୍ତ୍ବପୂର୍ଣ୍ଣ ରହିବ । ପ୍ଲେ -ଅଫର ଚତୁର୍ଥ ସ୍ଥାନ ପାଇଁ ଆଜି ବିଜୟୀ ହେବା ଆଶାରେ ଫିଲ୍ଡକୁ ଓହ୍ଲାଇବ କୋଲକାତା । ୧୨ଟି ମ୍ୟାଚ ଖେଳି ୧୦ ପଏଣ୍ଟ ସହ ପଏଣ୍ଟ ଟେବୁଲର ଏବେ ଚତୁର୍ଥ ସ୍ଥାନରେ ରହିଛି କୋଲକାତା । ସେପଟେ SRH ପଏଣ୍ଟ ଟେବୁଲର ଶେଷରେ ଥିବା ବେଳେ ଦଳ ୧୧ଟି ମ୍ୟାଚ ଖେଳି ମାତ୍ର ୨ଟିରେ ବିଜୟୀ ହୋଇଛି । ଚଳିତ ଆଇପିଏଲରେ ପ୍ରଥମ ଦଳ ଭାବେ ପ୍ଲେ-ଅଫ ରେସରୁ ବାଦ ପଡିଥିଲା ହାଇଦ୍ରାବଦ । ତେବେ ଆଜିର ଏହି ଦୁଇଟି ମ୍ୟାଚରେ କାହାର ଭାରି ରହୁଛି ତାହା ଦେଖିବାକୁ ବାକି ରହିଲା ।
