ଆବୁଧାବି: ଇଣ୍ଡିଆନ ପ୍ରିମିୟର ଲିଗ୍ ୨୦୨୧ର ୩୪ତମ ମ୍ୟାଚ୍ ଡିଫେଣ୍ଡିଂ ଚମ୍ପିଆନ ମୁମ୍ବାଇ ଇଣ୍ଡିଆନ୍ସ(MI) ଓ କୋଲକାତା ନାଇଟ ରାଇଡର୍ସ(KKR) ମଧ୍ୟରେ ରହିଛି । UAE ଲିଗ୍ର ପ୍ରଥମ ମ୍ୟାଚ୍ରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ପରାସ୍ତ ହୋଇଥିଲା ମୁମ୍ବାଇ । ଫଳରେ ଟିମ ଏହି ପରାଜୟକୁ ଭୁଲି ବିଜୟ ଟ୍ରାକ୍କୁ ଫେରିବା ଲକ୍ଷ୍ୟରେ ରହିଛି । ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି, ପୂର୍ବ ମ୍ୟାଚ୍ ଖେଳିନଥିବା କ୍ୟାପଟେନ ରୋହିତ ଶର୍ମା କୋଲକାତା ବିପକ୍ଷ ମ୍ୟାଚରେ ଖେଳିବାକୁ ଯାଉଛନ୍ତି । ଫଳରେ ଲଢେଇ ରୋହିତ ଶର୍ମା ଓ KKRର ମିଷ୍ଟ୍ରୀ ସ୍ପିନର ବରୁଣ ଚକ୍ରବର୍ତ୍ତୀଙ୍କ ମଧ୍ୟରେ ହେବାକୁ ଯାଉଛି ବୋଲି କୁହାଯାଉଛି । ଶୈଖ ଜାଏଦ ଷ୍ଟାଡିୟମ ଆବୁଧାବିରେ ଏହି ମ୍ୟାଚ୍ ଖେଳାଯିବ ।
ଉଭୟ ଟିମ ୨୮ ଥର ମୁହାଁମୁହିଁ ହୋଇଛନ୍ତି, ସେଥିରୁ ମୁମ୍ବାଇ ୨୨ଟି ଜିତିଥିବାବେଳେ କୋଲକାତା କେବଳ ୬ଟିରେ ବିଜୟୀ ହୋଇଛି ।
ରେକର୍ଡ କହୁଛି, ରୋହିତଙ୍କ ରେକର୍ଡ KKR ବିପକ୍ଷରେ ସର୍ବଦା ଭଲ ରହିଆସିଛି । ଫଳରେ ୩୪ ବର୍ଷୀୟ ଷ୍ଟାର ବ୍ୟାଟ୍ସମ୍ୟାନ କମବ୍ୟାକ କରିବାକୁ ଏହା ଭଲ ମୌକା ଭାବେ ବାଛିପାରନ୍ତି । ଟିମ ଇଣ୍ଡିଆର ଟି-୨୦ କ୍ୟାପଟେନ ୱେଟିଂ ଲିଷ୍ଟରେ ଥିବା ରୋହିତଙ୍କ ସିଧାସଳଖ ମୁକାବିଲା ମିଷ୍ଟ୍ରୀ ସ୍ପିନର ବରୁଣ ଚକ୍ରବର୍ତ୍ତୀଙ୍କ ସହ ହେବ । KKR ଖେଳିଥିବା ଶେଷ ମ୍ୟାଚରେ ବରୁଣ, ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(RCB)କୁ ଚିତ୍ପଟାଙ୍ଗ କରିଥିଲେ । ଫଳରେ ମାତ୍ର ୯୨ ରନ୍ରେ ଅଲଆଉଟ୍ ହୋଇଥିଲା ବିରାଟଙ୍କ ବାଙ୍ଗାଲୋର । ୩ ଓଭର ବୋଲିଂ କରି ୩ଟି ୱିକେଟ ହାସଲ କରିବା ସହିତ ୧୫ଟି ଡଟ୍ ବଲ୍ ବୋଲିଂ କରିଥିଲେ ତାମିଲନାଡୁ ସ୍ପିନର ବରୁଣ । ୩ଟି ୱିକେଟ ମଧ୍ୟରେ ଅଷ୍ଟ୍ରେଲୀୟ ପାୱରହିଟର ଗ୍ଳେନ ମାକ୍ସୱେଲ ମଧ୍ୟ ସାମିଲ ଥିଲେ । RCB କ୍ୟାପଟେନ ବିରାଟ କୋହଲି ମ୍ୟାଚ୍ପରେ ବରୁଣ ଚକ୍ରବର୍ତ୍ତୀଙ୍କ ପ୍ରଦର୍ଶନରେ ପ୍ରଭାବିତ ହେବାସହ ପ୍ରଂଶସା କରିଥିଲେ ଓ ଭାରତ ପାଇଁ ଟି-୨୦ ବିଶ୍ବକପରେ ଖେଳିବାକୁ ଯାଉଥିବାରୁ ବୋଲିଂରେ ପ୍ରମୁଖ ଭୂମିକା ନିଭାଇ ପାରନ୍ତି ବୋଲି କହିଥିଲେ ।
